Kings lakah Warriors an chak lo nawn
NBA champion lai Golden State Warriors an che fuh thei lo! Nimin zing playoff game 2 inkhelah Warriors hian Sacramento Kings chu 114-106 in an ngam lo, best of seven series khelh turah GSW hi 2-0 in an hniam mek.
Warriors hi 2019 NBA Finals khan a zawnin inkhel pahnihah an tlawm, a hnu lamah tun ṭum hi playoff chinah chuan an chak loh zawn lehna hmasa a ni hial. April 21, Zirtawpni zingah game 3 an khel leh ang, an inkhelhna tur hi Chase Center a nih avangin boruak erawh a danglam ang.
Golden 1 Centre-a inkhelah, mualneitu Kings tan De'Aaron Fox leh Domantas Sabonis ten point 24 ve ve an nei a, an chakna hnar an ni. Warriors forward Draymond Green chu Sabonis laka a chet dan mawi lo avangin hnawhchhuah a ni thung.
Golden State lam basket bulah ball an inchuh laiin Sabonis hi a tlu, a sira awm Green-a ke chu a pawm bet deuh tlat - Green hian a ke laksawn a tum a, a lo kuah avangin Sabonis hi a awmah a rahsak lui deuh kher - hremna a tawk zui ta a ni.
Green chuan, "Ka ke kha khawiah emaw ka nghah a ngai, ka khai reng thei bik lo, ka ke kha a pawh tlat avangin hmun dangah ka kal thei lo," tiin a tih luih a nih loh thu a sawi a, a tihsual niah a ngai lem lo.
Kings player Sabonis chuan, "Ball per kang lai chan tumin kan inchuh a, ball chan ngei tum ve ve kan nih avangin kan innek tlu, khatiang chu basketball huangah chuan thil thleng thei a ni, match lehpek a nghahhlelhawm hle," a ti.
Nimin zing Eastern Conference lam playoff inkhelah Philadelphia 76ers chuan Brooklyn Nets 96-84 in an hneh, anni pawh hian best of seven series khelh turah 2-0 a hmahruaiin an dinhmun an siamṭha hle.
Quarter hnihna an khelh laiin Sixers hi point 10-in an hniam zawk, mahse quarter thumna bikah 24-14 ngawtin an lehthal a, a tawpah a chungnung zawk an nih theih phah - hnehna an chan theih nan Tyrese Maxey chu point 33 neiin a thawhhlawk hle.
April 21, Zirtawpni zing dar 5:00-ah Nets leh Philadelphia 76ers te hian game 3 an khel leh dawn. New York khawpuia awm Barclays Center hi Nets hmunpui a ni ve thung; Sixers tan hna a hautak ve thung dawn a ni.