Defensive player of year atan Jackson

Basketball inelna lian ber NBA season kal laiah - Memphis Grizzlies forward Jaren Jackson Jr. chu NBA Defensive Player of the Year atan thlan a ni, he chawimawina dawng tur hian Brook Lopez chu a khum a ni.

Kum 23 mi Jackson hian NBA-ah season nga a hmanna a ni a, tun season bikah chuan chawhrualin match tin an khingpuiin basket an neih tur ṭum thum a lo dansak (block) ziah, team tan a ṭangkai rem rem hle.

American tlangvalin vote a hmuh belhkhawm chu 391 a ni a, pahnihna Milwaukee Bucks player Lopez chuan vote 309 a hmu thung. Pathumnaah Cleveland Cavaliers duhlai Evan Mobley (101 points) a awm thung.

Jackson chuan, "Keimah chauh ka ni lo, team pumin venhim hna kan thawk ṭha, a rah chhuah ka chungah a lang," a ti. Memphis Grizzlies coach Taylor Jenkins chun tun thlatir khan a player hian chawimawina a dawn ngei a rin thu a lo sawi tawh a ni.

Jackson hian chhun tur a nei ṭha, a pa Jaren Jackson chuan tun hmain season 13 chhung NBA hi a lo khel tawh, kum 1999 khan San Antonio Spurs chu a lo champion pui hial tawh - a fapain a sulhnu a rawn chhui chho mek.