United defender Martinez an zai

Manchester United defender Lisandro Martinez chu a ke rêk dinglam hliam zai a ni. Argentina international hian tluang taka zai a nih thu a sawi a, tunah chuan season thar nghakin a hun a hmang chho rih dawn a ni.

Man United leh Sevilla ten Europa League an khelh ṭumin Martinez hi a inhliam, endik a nih hnuah tun season chhung chuan a inkhel hman dawn tawh lo tih hriat a ni - Erik ten Hag leh a naute tan chuan chânna lian tak a tling.

Tun season kal laia United tana match 45 khel tawhtu Martinez chuan, "Kan beisei ang takin hlawhtling taka zai a ni, dam leh thuai tura min duhsakna thu ka dawn zawng zawngte avangin lawmthu ka sawi tak meuh.

"Tunah chuan dam leh thuai tura enkawl ka ni dawn, hun harsa tawh laia min thlawp tlat tute hian chakna min pe ṭhin," a ti a, season tharah chuan ngaiawh leh hman a inbeisei hle a ni.

Ajax aṭanga an lakluh Martinez hi Ten Hag-a'n a ringtawk hle. Premier League center back zinga tawi ber ni mah se Man United tlarhnung luahlumtu a ni phak - Raphael Varane nen an inkawp rem hle.

Martinez bakah hian Sevilla lakah Varane a inhliam bawk. Harry Maguire luh hnuah United hian goal hnih an chhuah chhunzawm a nih kha, kartawp Premier League-ah erawh goal an chhuah lo thung.

League Cup champion hian Europa League leh FA Cup champion an la beisei a, an defender rinrawl ber Martinez tel lo hian hlawhtlinna an chang thei ang em, tih chu fiah a ni dawn, captain Maguire chu mipui mit fukna a ni leh dawn a ni.