Pasarihnaah Rune a awm

Holger Rune chuan Monte Carlo Maters nomawi chawi phak chiah lo mah se, tun kara world ranking chhuak thar berah parukna dinhmun a luah - tennis a khelh hun chhunga a tawn san ber ṭum a tawng mek a ni.

Danish rawlthar Rune hian nomawi inchuhna inkhelah Andrey Rublev a ngam lo, a duhthusam ang thlap result nei lo mah se ranking lamah chuan a hmaa awm player pahnih a kal kan ta tho.

Ranking sang zual 10 zingah Casper Ruud, Rublev leh Daniil Medvedev te chuan hma an sawn vek. Monte Carlo Masters champion Stefanos Tsitsipas erawh a title a hum loh avangin ranking lamah a tlahniam hret thung.

Lorenzo Musetti hneh lotu Novak Djokovic chu a chung berah a la awm chhunzawm tho. Serbian star hian result nei ṭha tawk lo mah se amah hnaih bertu Carlos Alcaraz a inkhel thei rih lo a, a dinhmun a sawhnghet zel zawk a ni.

Tun kara khelh tur Banja Luka Open-ah Djokovic hi inlan a tum, world number 1 hian Monte carlo Masters an khelh lai khan a kiu hliam a dam fel tawk lo deuh tih a sawi a, tunah erawh inelna hmachhawn turin a inbuatsaih thung.

Grand Slam vawi 22 champion tawh Djokovic chuan, "A nihna takah chuan ka kiu kha 100%-in a dam fel lo, mahse tunah chuan inkhelhpui theih a ni thung. Match hmasa ber kan khelh turah ka inpeih hman ngei ka beisei," a ti.

Djokovic hian zaninah a match hmasa ber atan Netherlands tlangval Luca Van Assche a hmachhawn ang. Novak hi seeded pakhatna pek a ni a, qualifying khelh hah a ngaih loh bakah round hmasa ber khelh a ngai lo bawk.

World number 2 Carlos Alcaraz erawh Barcelona Open lamah a inlan a, nizan khan a match khatnaah Nuno Borges nen an inkhel a, result erawh kan hre hman lo - tunlaia clay court tournament an khelh ho hi French Open inbuatsaihna a ni.

May thlaah French Open khelh a ni dawn, champion lai Rafael Nadal chu a inlan thei dawn em, tih a la chiang lo. Nadal hi Australian Open hnuah hliam vangin a la inkhel leh thei lo, tun hnai khan Monter Carlo Masters bakah Barcelona Open aṭangin a inhnukdawk.