Chelsea neitute sawiseltu Thiago Silva

Real Madrid lakah Chelsea an tlawm a, season an hmang chhe em em bawk - a lawm lo langsar chu defender tawnhriat nei ngah Thiago Silva a ni a, Brazilian defender ropui hian Real an ngam loh zawhah inthlahrung hauh loin club neitute a sawisel.

Silva chuan, "A tir aṭangin an thutlukna a dik lo a, mahse, thutlukna chu siam a ni tawh. Manager sawisel leh rikngawt ṭhin a ni lo a, mawhphurhna kan la ngam tur a ni. Thutlukna siam kan harsat em em zel a, club tan hun thim tak a ni," a ti.

Kum 38 mi defender chuan sawi zawmin, "Club neitu a inthlak a, player thar tam tak kan lalut a, kan dressing room-ah kan len loh avangin tihlen a ngai hial a ni. Kan zavaia kan khelh vek theih loh avangin player lungawi lo pawh an awm lo thei lo.

"Manager tan player 30 vel aṭanga 11 chauh thlanchhuah chu a harsa em em ang tih ka ring. Ṭhenkhat chu squad-ah pawh an awm phak lo. January-ah player pariat kan lalut a, heng zawng zawng hi ruahmanna mumal zawk nena kan tih a ngai. A nih loh chuan kan chetsualna ngaiah bawk kan chesual nawn mai ang," a ti.

Silva chuan manager chauh dem lo a, player-te pawhin mawhphurhna an lak ngam a ṭul thu sawiin, "Manager thlak chungchangah kan sawi hnem mah mah a, player pawhin mawhphurhna kan lak ve a ṭul.

"Manager pathum tun season-ah kan nei tawh a, Bruno nen phei chuan pali niin, ani pawhin min chakpui chuang lo. Zaninah kan tlawm a, Lampard hoin kan la chak lo. Mi zawng zawngin manager chungchang an sawi a, mahse, eng nge kan tihsual a, eng hi nge thlak ngai, kan thlir a ṭul," a ti.

August 2020-a Chelsea zawmtu Silva hian Blues-ah kum khat chiah contract a nei tawh a, kum 38 a nih tawh bawk avangin Champions League khelh leh a inbeisei tawh lo hial.

Silva chuan, "A mimal tak pawhin ka tan chuan season duhawm lo leh harsa tak a ni a, Champions League-a ka match hnuhnung ber a ni tawh mai thei a ni," a ti - European football-a club inelna sang berah hian match 105 khel tawhin, kum 2021 khan Chelsea tan Champions League nomawi a chawi a ni.

Chelsea hi khelmual chhungah mai a ni lo, a pawn lamah pawh an talbuai takzet - Brighton laka an tlawm khan club neitu Todd Boehly leh Behdad Eghbali te chuan dressing room an luhchilh nia sawi a ni a, hei hi an sawisel nasa hle. Mahse, Real laka an tlawm zan pawh hian Boehly leh Eghbali chuan dressing room an lut leh niin khawthlang media-te chuan an tarlang.