Oriflame 23rd MFA Cup Team an inthlau lo, inkhel a hmuhnawm

Mizoram Football Association buatsaih Oriflame 23rd MFA Cup chu Khawzawlah khelh chhunzawm zel a ni a, district hrang hrang football club-te inelna neih mekah hian team an inthlau lo hlawmin inkhel a hmuhnawm thei hle.

Mizoram Premier League khel tur Project Veng FC pawh an che hleithei bik lo, an match hmasa zawka Melbuk nen an inhnehtawk hnuah nimin khan Khawzawl Vengthar GSA chu 2-0 in an ngam lo.

Khawzawl hi inelna thlengtu an ni a, anmahni khelmuala khel an nih bakah ṭantu an nei ṭha. Inkhel hmuhnawmah Benjamin Lalruattluanga chuan goal hnih a khung - Kolasib team lamin a chhanletna tur nei loin an tlawm.

Inkhel pakhat zawkah Champhai District aiawhtu TMFC, Melbuk chuan Sihphir Venghlun 5-1 in an hneh. Melbuk tan Eliazer Vanlalchhanhima'n goal hnih a khung bakah Robena, Lalrohlua leh Lalnunsanga ten goal khat ṭheuh an khung ve bawk.

Vawiin inkhel tur hi a hmuhnawm dawn. An match khatnaa goal nga khung thei FC Serchhip Kawnpui chuan Lawngtlai Vengpui an hmachhawn dawn - Lawngtlai hi Mizoram Inter-District Junior Boys Football Championship neih zawk taka champion team neitu kha an ni.

Chawhnu lamah Saitual District aiawhtu Melveng FC chuan Field Veng, Mamit an tum dawn. Mamit hi an match hmasa lamah Serchhip ngam loin an mualpho a, tun hi insiamṭhatna hun tur a ni ang.

MFA Cup khelh laiah hian team pakua an inlan, group pahnihah ṭhenhran an ni. Group pakhata awmte hi an inkhel kual dawn, chumi hnuah a sang pahnih ten semifinal an khel ang. Inelna hi April 29, Inrinnia zawh tura ruahman a ni.