Kan inthlahdah zui lo ang - Lampard

Champions League aṭangin Chelsea petchhuah an ni a, tun season atana nomawi beiseina a tawp a, an beisei theih san ber chu season thara Europa League khelh a ni tawh mai!

Chelsea-in Frank Lampard an lakluh hnuah match li khel tawhin an tlawm vek - Real Madrid lakah vawi hnih an tlawm a, Wolverhampton Wanderers (1-0) leh Brighton & Hove Albion (2-1) chu an ngam lo bawk. Real hneh loh hi hriatthiam theih a ni a, Wolves leh Brighton laka tlawm erawh Blues tan a na.

Lampard chuan khelh chhan pawimawh nei tam tawh lo mah se an inthlahdah loh tur thu a sawi a, season tawp thleng atana contract an ziahpui coach hian chhe taka season khar a duh bik lo.

English coach chuan, "Game tinah kan theihna zawng zawng kan hlan tur a ni. Kar hnih chiah he hmunah hian ka la awm a, chak duhin ka tuihal a ni. Tumah kan inthlahdah thiang lo a, season tawp thlengin theihtawp kan chhuah ang," a ti.

Chelsea tan goal 211 khung a, Blues tana goal khung hnem ber record chelhtu Lampard chuan inkhel thlirletin, "Kan chak loh chhan hi theihtawp kan chhuah loh vang a ni lo. Kan chance neih ngahzia thlirin ka player-te ka sawisel thei lo a, kan hun ṭha neih kan chhawr loh kha kan tuar mai mai a ni.

"Goal khung ngat ila chu thil kha danglam thei a ni. World Class team kan tum a, ka ngaihdanah chuan team ṭha zawk kan ni. He hmuna ka rawn kir leh hnuah a vawi khat nan hmasawnna ka hmu a, kan thusawite pawh khelmualah kan lantir ṭan a, hei hi season tawp thlenga chhawm nun kan duh.

"Kan inthlahdah thiang lo a, kan khelh ṭhat hi kan chhawm nun a ṭul - tuna kan result te hi nghilhin, theihtawp kan chhuah chhunzawm ang," a ti - Blues hian April 26 zanah match an nei leh dawn chauh a, Premier League match-ah Brentford an mikhual ang.