Bei tidawng Chelsea - beisei tur a awm ta lo!

March 16 khan khatihlaia Chelsea boss Graham Potter chuan, "Everton hneh kan tum phawt ang a, chumi zawhah Champions League-a kan hmachhawn tur hriain, European champion nih kan tum ang," a ti a, he thu ngaithlatu fan-te chuan lawm takin kut an beng.

Mahse, duhthusam leh a tak ram chu hla tak a ni - Thawhlehni zan khan Chelsea hian Champions League quarterfinal second leg-ah Real Madrid chu 2-0 in an ngam lo a, inkhel hmasa nena belhkhawmin 4-0 ngawtin an chak lo.

Champions League aṭanga petchhuah an nih meuh chuan an coach pawh Graham Potter ni loin Frank Lampard a ni tawh a, Potter thlak tura season tawp thleng atana an lak coach hian result ṭha a la neihpui thei lo - match li an khelh tawhah match li an tlawm!

Stamford Bridge-a inkhelah Chelsea hmasawnna hmuh turin awm mah se a pawimawh ber goal erawh an khung thei lo a, Real tan Rodrygo chuan goal hnih a khung thung - a tawpah chuan semifinal lut ṭhang Real bawkin a thiam pali zingah an hming an nem kai a, a vawi 15 nana champion tumin kawng dik an zawh zel.

Ruahmanna ṭha lo

Chelsea hian tun season-ah player lei nan ringawt pound maktaduai 600 an seng - heti zat sum hi chuan Premier League club tam zawk a lei theih a ni mai lo a, a sum bangin team thar ṭha tak a la din theih hial ang.

Mahse, Chelsea neitu Todd Boehly leh a thawhpuiten awmze neiin sum an seng lo. An elpui club-te player melh apiang an lo melh ve ringawt em ni chu aw, tih mai tur a ni a, player thar lakluh nana £600mtd ngawt sengtu club hian goal khungtu tur an nei lo.

Real lakah pawh Blues hian comeback chance an nei a, mahse, an chance neih hi goal khung khat tak N'Golo Kante leh Marc Cucurella ke bulah ber kher a tla a, Blues hian an chance neih an chhawr thei lo - Kante hian Kai Havertz-a ball pet hman loh chu nang fuhin, yard 12 vel lek aṭangin goal zawnah a pet thei lo!

Kante hian a chance neih hi chhawr thei ngat se, result a danglam ngei ang. First half hun pek belhah Cucurella chuan chance duhawm a nei bawk - mahse, Reece James-a siamsak, hnai set sawt aṭanga a pet chu Real keeper Thibaut Courtois chuan ṭha zetin a dansak a, Cucurella-a'n a shot hmaa insiamrem turin hun a duh rei hret.

Hei le Real

Chelsea-in first half-ah hmahruaina remchang vawi hnih ngawt an nei a, khung ngat se, inkhel thawnthu a danglam thei hial ang - mahse, Chelsea-in goal khung thiam bika chhal theih player an neih loh laiin Real erawhin tlarhmaah Vinicius Junior, Karim Benzema leh Rodrygo te an tlar thei.

Spanish champion hian first half-ah pawh chance an nei ve tho - mahse, Rodrygo chuan a chance neih duhawm chu post tihper nan a hmang a, Luka Modric leh Vinicius ten an hun ṭha neih an chhawr thei lo bawk.

Real danglamna erawh chance an insiam nawn thei a, hun ṭha pek nawn an nih chuan an hlah lo bawk. Minute 58-naah Rodrygo tan hun ṭha a her nawn a, Brazilian forward hian a hlah tawh lo - Vinícius-a siamsak chu Rodrygo hian hnai set sawt aṭangin chiang takin goal-ah a chantir.

Inkhel hmasa nena belhkhawmin 3-0 a ni der tawh a, Chelsea tan beisei a bo ṭan. Hun tawp nan minute 10 chiah a awm tawh tihah Rodrygo hian Chelsea chak loh a nemnghet a, Federico Valverde-a'n hmasial lo tak chunga a pek chu a goal hnihna ni turin a khung.

Van a duai

Chelsea fans tana lawmawm lai chu inkhelah hmasawnna hmuh tur a awm chu a ni a, chutihrual chuan an tlak miau avangin lawm luih a harsa ang - goal hmaa Kante leh Cucurella te hriam tawk lo chu a pawi vawng vawng a, hei lo pawh chance dang an nei nual bawk.

Second half-ah Kante leh Enzo Fernandez ten chance nei leh bawk mah se, hei pawh an chhawr thei lo a, Real tan goal khung thiam Karim Benzema pawhin a hun ṭha neih a chhawr lo - Chelsea an khel ṭha a, a pawi ber erawh an tlawm ta tho chu a ni.

Blues hian second half-ah Raheem Sterling, Joao Félix, Mykhailo Mudryk leh Mason Mount te luhtir mah se goal erawh an keng tel bik lo a, Chelsea hi Champions League aṭangin an tla a ni satliah lo a, season tharah European football-a club inelna sang ber an khel dawn lo tihna a ni bawk.

London club hi Premier League table-ah 11-na an ni mek a, palina Newcastle United an phak lohna chu point 17 lai a ni tawh a, match sarih chiah khelh tur an neih tawh bawk avangin season thara Champions League khelh chu an tan vana rah ang a ni tawh.