Kiang r'u... Olivier Giroud hoin Milan an lo lang e!

Europen football huangah chuan AC Milan hi team hlauh-awm an ni, sulhnu an nei ṭha miau a, an thisenin a ngam bawk. Milan chuan Napoli 2-1 a hnehin Champions League semifinal an lut.

Quarterfinal inkhel hmasaah Milan hi 1-0 in an chak. Thawhlehni zan khan Naples khawpuiah second leg khelh niin, team pahnih 1-1 in an inhnehtawk - inkhel pahnih belhkhawmah Milan hi 2-1 in an chak.

Stefano Pioli-a naute hian semifinal-ah chuan Inter Milan leh Benfica inkhela chak zawk an hmachhawn leh ang, nizan khan Italian leh Portuguese club te hian quarterfinal an khel a, result kan hre hman lo.

Giroud-a goal

San Siro-ah Milan an chak a, a chak lo lam Napoli coach Luciano Spalletti-a'n, "Second leg-ah chuan Victor Osimhen a khel dawn alawm," tiin a inhnem - Serie A goal khung hnem ber hi Thawhlehni zan inkhelah en bik a ni.

Mahse, Stadio Diego Armando Maradona-ah hming langsar a awm, ani chu Osimhen ni loin Giroud a ni. A hun ṭha hmasa berah erawh Giroud hi a che fuh nghal mai bik lo, a penalty pet chu Napoli keeper Alex Meret-a'n a lo dansak.

Chawlhlawk hma hretin Milan lamin goal an nei, forward Rafael Leao-a'n yard 70 zeta thui ball a khalh a, chumi hnuah box chhunga chân loha awm Giroud tan a siamsak, ani hian awmna tur hmun a thlan dik avangin harsa vak loin goal a khung.

Goal mamawh Napoli lamin Milan tlarhnung an su hawng thei lo. Milan defender Fikayo Tomori-a 'n hand ball vangin penalty a chawi, mahse Khvicha Kvaratskhelia-a pet chu goalkeeper Mike Maignan-a'n a lo dansak hlauh.

Hun tawp dawnah Victor Osimhen-a'n goal khat a tauh lut hram. Nigeria international hian harsa tak aṭangin si phurh a sut ṭhen, mahse goal dang khung leh turin Napoli tan hun a awm tawh lo, an tan UCL a tawp rih.

UCL leh Milan

AC Milan hian 2007 khan Champions League nomawi hi an chawi, a hnuah chuan tun ṭum hi UCL semifinal an luh lehna hmasa ber a ni hial. Tunah chuan nomawi chawi turin team pahnih chauh paltlang a ngai tawh, an duhthusam ram tihhlawhtlin an tum ang.

Stefano Pioli-a'n Serie A aiin Champions League a ngai pawimawh, kartawp league match an khelh ṭum khan a player ṭha 10 ngawt a hahchawlhtir a, a ngaih pawimawh hunah chuan an ṭhat dan takin a tir aṭangin an inrem nghal thlap.

Rossoneri coach Pioli chuan, "AC Milan ka enkawl tirha ka bul ṭanna kha ka la hre reng. Europa League group stage atan pawh kan tling nghal lo, qualifying khelh phawt kan ngai a nih kha, tunah chuan Champions League semifinal kan sawi ta.

"European football bul kan ṭanna ngaihtuah chuan kan thlen chin hi a lawmawm hle, a bik takin rinkai lo zawk ni chunga hnehna kan chang ṭhin hi a lawmawm lai chu a ni," tiin a sawi a, semifinal-ah chuan tu pawh hmachhawn se theihtawp an chhuah tur thu a sawi bawk.

Milan manager awm tawh zingah Pioli hi Champions League semifinal thleng thei pasarihna a ni, kum 16 liam ta khan Carlo Ancelotti hoin an champion a nih kha, ṭhangkhat lian zet hnuah nomawi chawi thei dinhmunah an ding leh mek a ni.

Napoli tan Serie A

Luciano Spalletti enkawl Napoli hian Serie A nge Champions League nomawi an duh zawk thlang dawn se la, thutlukna siam an harsat mai thei. An tan chuan kumina UCL an thlen chin hrim hrim pawh hi mellung a ni tawh.

Naples club hian Diego Maradona hunlai khan vawi hnih chu Serie A nomawi an chawi tawh, a hnu lamah an la champion leh lo. Maradona a thi a, an khelmual chu Stadio Diego Armando Maradona tiin a hming an thlak, a sirah Mardona lim an dintir bawk.

Italian football inelna sang berah point 14-in hma an hruai mek a, champion lai Milan kut aṭangin nomawi chu an chhuhsak ngei a rinawm. League bakah Champions League lama thlen san bawk chu an player neih dan nen a harsa tih a hriat.

Napoli coach Luciano Spalletti chuan, "Inkhel pahnihah Milan khan goal khung theihna remchang an siam hnem zawk a, an chak avangin ka lawmpui, hun pawimawh laia an che fuh khan team puitling zawk an ni tih a entir.

"International break awm kha kan tuar na hle, kan player ṭhenkhat hliam chungin an lo let. A bik takin Osimhen hi ni 20 chhung a chawlh hnuah tun hnaiah a lo kir ve leh chauh," a ti a, tun hnaia an result ṭha tawk lo chu siamṭhat an tum tih a sawi bawk.