Man United an tla dawn?
Manchester United tan League Cup chauh kha season hlawhtling chhiar nan a tlak loh, chuvangin Erik ten Hag-a'n hna a thawk ṭha takzet em, tih fiahna tur chu Europa League hi a ni ang - zanin dar 12:30 hian Sevilla mualah an lut dawn.
Old Trafford-a an inkhelh ṭumin Man United hian 2-0 in hma an hruai, mahse a tawpah erawh Harry Maguire-a'n anmahni lamah ti lutin 2-2 in an inhnehtawk, zaninah a tlang zawk tur tan goal khung ngei a ngai.
United an buai?
Ni e, zep tur a awm lo - Sevilla an mikhual ṭum khan hun tawp dawn lamah Manchester United an buai takzet. Hliam vangin Lisandro Martinez thlak a ngai a, a tan season a tawp zui, defender ṭha Raphael Varane pawhin hliam tuarin an thlak.
Martinez leh Varane chhuah hnuah Harry Maguire leh Victor Lindelof te an lut a, goal hnih an chhuah. Zaninah anni pahnih hi Ten Hag-a'n duhthlan tur a neih chu an ni leh mai, Spanish team lakah an buai leh mai ang em, tih chu zawhna lian tak a ni.
Europa League-ah an buai deuh a, mahse kartawpa Nottingham Forest an hneh ṭum erawhin Maguire leh Lindelof te inkawp hian goal an chhuah lo, zaninah Forest laka an result ang kha neih chhunzawm an duh ngei ang.
Man United hian hrem vangin Bruno Fernandes an chhawr thei dawn lo. Portugal international hi tun season Man United match 51 zinga match 49 kheltu a ni a, a pawimawhna a sang hle, inkhel pawimawhah chuan a khel zel tihna a ni.
Fernandes a awm loh chuan Christian Eriksen mawhphurna a sang ang, ani hi Casemiro nen an inkawp fuh a nih ngat chuan Sevilla laka inkhel thunun thei turin an ṭha tawk - ball sem tur lam chu an ngaihtuahawm hran lo.
An buaina pakhat chu goal khung a ni, hliam vangin Marcus Rashford a inlan thei dawn lo. English forward tel lo chuan United hian goal khung an harsat ṭhin, zaninah hliam damkawr Antony Martial chungah mawhphurhna a sang dawn.
Rome leh Juve
Zanin inkhel tur zingah AS Roma leh Feyenoord inkhel tur hian ngaihven a hlawh. Netherlands lama an inkhelh tawhnaah Jose Mourinho naute hi 1-0 in an chak lo, semifinal luh tumin zaninah goal khung ngei tumin an bei dawn a ni.
Team pahnih hian 2015 khan Europa League-ah tho buaina an lo nei tawh. Roma khawpui thuneitu lam chuan buaina lian a chhuah leh an hlau a, tun hma thil thleng avang hian Dutch team lam ṭantute hnenah ticket pawh an pe chhuak lo.
Dutch fans tan lawm loh ngawt theih a ni bik lo; Stadio Olimpico-ah hian lut thei lo tura hrem lai an ni. Heti chung hian Feyenoord ṭantu tam tak chu Rome khawpuiah an zin lut tho a, khelmual chhung an lut lo a nih pawhin a pawn lamah an thawm a ring dawn.
Season kal laiah Italian team te European football lamah an che thei viau. Champions League quarterfinal chinah team pathum an nei a, Europa League lamah pawh Roma leh Juventus an la dam - Juve hi semifinal lut turin an dinhmun a ṭha rih viau.
Old Lady hian khualmualah Sporting Lisbon an lenchilh dawn, an intawn hmasakin si khat faiin an chak tawh a, tlang turin Massimiliano Allegri naute tan goal venhim a tawk, chutihrualin minute 90 chhung inven tawp chu a tih chi ber lo ang.
Italian manager Allegri chuan, "Sporting-in goal khung an thiam tih kan hria, chumi veng tur chuan nasa takin kan inbuatsaih. Mahni inven kan ngaih pawimawh tluk zetin goal khung pawh kan tum ang," tiin Portuguese club lakah goal khung an tum thu a sawi.