Match hmasa berah Raducanu a tla

Emma Raducanu tan clay court season zet chu a harsa leh dawn niin a lang. Thawhlehni zan khan Raducanu hi Stuttgart Open-ah a inlan a, a match hmasa berah Jelena Ostapenko hneh loin a zinkawng a tawp nghal.

British number 1 Raducanu hian ball vuak sual a ngah, minute 59 chhung lekah French Open champion hlui Jelena Ostapenko lakah hian 6-2, 6-1 in a chak lo, season hmasa kha chuan Stuttgart Open-ah hian quarterfinal a thleng a ni.

Tun dinhmunah Raducanu hi world number 68 a ni a, ranking chhuak tharah chuan a tlahniam dawn. US Open champion hlui hian tun hnaiah result ṭha a nei hleithei lo - French Open atan inbuatsaihna a la nei ṭha thei rih lo.

French Open 2017 champion Ostapenko hian winners vawi 26 ngawt a vuak chhuah theih laiin, a khingpui Raducanu erawhin ṭum ruk bak a nei thei lo, a match lehpekah chuan seeded pathumna Ons Jabeur nen an inkhel ang.

Inkhel dangah seeded pasarihna Daria Kasatkina chu Paula Badosa lakah 6-1, 6-1 in a chak lo a, seeded chang phak zinga tla hmasa ber a ni. Badosa hian qualifier paltlanga inlan Cristina Bucsa a hmachhawn leh dawn a ni.

Hmeichhe world number 1 Iga Swiatek a dam tawh. Poland nula hi hliam vangin thla khat chuang a chawl, tunah erawh inkhel turin a inpeih leh tawh - zanin hian a match hmasa ber atan Chinese nula Qinwen Zheng nen an inkhel ang.