Kompany-a Burnley tan nghah a la ngai

Season tharah Burnley-in Premier League an khel dawn tih a chiang tawh a, Thawhlehni zan khan Championship nomawi hlawhchhuah theihna chance an neih erawh an bawhpelh - an champion ngei erawh a rinawm a, an la nghah hret a ngai, tih chauh a ni.

Burnley hian Rotherham United lakah point thum hmu se, champion mai tur an ni a, mahse, khualmualah relegate hlau team nen 2-2 in an inhnehtawk a, champion nomawi an la chawi thi rih lo.

Manchester City legend Vincent Kompany enkawl Burnley hian goal pawh an khung hma - minute 26-na lekah Scott Twine chuan goal hmahruai a khung a, mahse, Burnley right back Vitinho chuan first half hun pek belhah an lamah tilutin, Rotherham si phurh a sutsak.

First half-ah goal dang lut loin chawlhlawk hman a ni a, second half-ah pawh rei tak chu goal a lut lo. Team ṭha zawk Burnley-in chak loh an duh lo tih pholangin, Scott Twine chuan minute 81-naah mawi zetin a khung.

Burnley hian harsatna nei loin hnehna an chang zui mai tura ngaih a ni a, mahse, a la tawp lo - hun tawp nan minute nga chiah a awm tawh tihah Georgie Kelly chuan khung ve lehin, 2-2 in inkhel a tawp a, Burnley tan champion turin nghah a la ngai.

Ni 11 liam taah khan Burnley hi season thara Premier League khel turin an inpetkai tawh a, Rotherham lakah chak zo lo mah se thilmak danglam a thleng a nih loh chuan nomawi pawh an chawi ngei dawn - match li khelh tur an la nei a, anmahni hnaih bertu Sheffield United lakah point 10-in an sang zawk mek.

Burnley boss Vincent Kompany chuan, "Ka nauten hei aia result ṭha zawk an phu a, pawi ka ti. An khel ṭha takzet - khelh chhiat chang hi chu a awm ṭhin a, mahse, tun ṭumah chuan chutiang engmah a awm lo.

"Kan hun neih kan chhawr loh chuan a harsa dawn tih a lang a, game kha titawp thei kan ni. Kan chance neih harsa tak aṭangin kan khung a, mahse, chance awlsam em ema lang aṭangin kan khung lo leh lawi si. Mahse, Inrinniah chance dang kan neih lehnghal dawn avangin sawisel hluai tur erawh a ni lo," a ti a, hun ṭha an neih leh dawn avanga a lungawi thu sawiin, chak chunga point thum hlawh loh chu a naute tan zawk a hrehawm a rin thu a sawi bawk.

Burnley hian April 22 zanah Queen Park Rangers an mikhual dawn a, hnehna an chan chuan Championship nomawi an chawi ang - mahni khelmual ngeia nomawi chawi hi fans tam tak chuan an duh zawk hial ang.