Clippers lakah Suns chak ve thung

Match hmasa bera an chak loh hnuah Phoenix Suns an tho chhuak. Nimin zing NBA playoff inkhelah Suns hian Los Angeles Clippers chu 123-109 in an hneh, best of seven series khelh turah team pahnih hi 1-1 in an intluktawk mek.

Suns tan Devin Booker-a'n inkhel bul a ṭan a, point 38 a neih bakah assist ṭum kua a nei. Quarter hnihna an khelh laiin Suns hi point 13 ngawtin hniam mah se, a tawpah erawh fal takin an lehthal thei ta tho.

Booker chuan, "Playoff a nih tawh hi chuan a boruak a danglamin a nuam bik, tunah chuan game khat ve ve kan la ta. Kan hmabak chu Los Angeles lama zin a ni," tiin a sawi.

April 21, Zirtawpni zing dar 8:00-ah game 3 an khel leh dawn. Clippers khelmual Crypto.com Arena-ah hian game 3 leh 4 an khel dawn, mikhual Suns tan game khat tal lak theih a pawimawh ang.

Eastern Conference playoff lamah Boston Celtics an kal fal. Boston hian game 1 an lak hnuah nimin zing khan Atlanta Hawks chu 119-106 in an hneh nawn, series-ah 2-0 in hma an hruai - tlang tur erawhin vawi li tal chak tlin a ngai.

Boston Celtics tan Jayson Tatum-a'n point 29 a nei, ani bakah hian player dang pali chu point 10 chuang an nei thei - mimal thawh ṭhat chu thuhran ni se, regular season ang bawkin team thawhhona ṭha chu an chak chhan a ni bawk.