Jamshedpur an chak vek!

Hero Super Cup khelh mekah semifinal an lut tawh tih inhresain Jasmhedpur FC an inlan a, Gokulam Kerala lakah 3-2 in an chak - group stage-a match thum an khelhah an chak vek a ni!

Jamshedpur tan hian Harry Sawyer, Farukh Choudhary leh Ishan Pandita te chuan goal khat ṭheuh an khung a, I League club tan Samuel Koney chuan goal hnih khung mah se a team a chhanhim zo ta lo a ni.

Ghanaian forward Koney hian Gokulam tan goal hmahruai a khung hial - Men of Steel tan Sawyer leh Farukh ten an chhanlet hnuah Koney hian si phurh a sut leh bawk.

A tawpah erawh ISL club danglamna a lang a, Jamshedpur tan Ishan Pandita chuan goal khung lehin, 3-2 in an chak - JFC hian semifinal an luh tawh sa avangin an indah ṭha nual.

Hei vang hian Ricky Lallawmawma leh Laldinliana Renthlei te chu khelmualah luhtir an ni lo a, PC Laldinpuia chuan inkhel bul a ṭan thung.

Thawhlehni zan inkhel dangah FC Goa chuan 1-0 in ATK Mohun Bagan an hneh a, team pahnih hi an inhnehtawk mai dawna a lan hnu, minute 89-naah Syria international Fares Arnaout chuan Goa chakna goal hi a khung a ni.

Bagan tan Lalrinliana Hnamte chuan inkhel bul ṭanin, K. Lalṭhathanga (Puitea) chu bench aṭanga luhtir a ni bawk a, Goa lamah Ayush Chhetri chu minute 84-naah luhtir a ni bawk.

Hero Super Cup group stage match chu nizan khan khelh zawh a ni a, group D-a team paliten match khelin, an group-a a sang ber chuan semifinal-a hmun ruak pakhat la awm chu an chang dawn a ni - he thu buatsaih a nih lai hian result kan hre hman lo.