Munich lamah Thiem a chak phawt

French Open inbuatsaihna tournament zinga mi Munich Open khelh mek a ni a, clay court-a inkhel thiam Dominic Thiem chuan round hmasa ber a paltlang. Austrian tlangval hi a khingpui a inkhelh tluan theih loh avangin chaka puan a ni.

US Open champion hlui Thiem hian minute 35 chhungin set khatna chu 6-3 in a la. Set hnihnaa game hmasa ber an khelh laiin Constant Lestienne a inhliam a, enkawl lailawk ni mah se a inkhel chhunzawm thei tawh lo.

Thiem hi player beiseiawm berte zinga mi a ni ṭhin, inelna lian US Open nomawi hial pawh chawi tawhin a vanglai chuan world number 3 a ni phak. Mahse, a banrek hliam vangin a buai a, rei tak a inkhel mumal thei lo a ni.

A hliam dam hnuah pawh ngai a awh leh thei mai lo, tunah hian kum 29 mi niin ṭha taka khel chhuak leh turin hun ṭha a la nei. Thiem tan tun season hi hun ṭha a ni thei tura ngaih a ni a, clay court inelna lian khelh hma ngeiin ngaiawh a tum ang.