Hnehna nena bul ṭan Alcaraz

Carlos Alcaraz hliam a dam tawh a, world number 2 hian Barcelona Open nomawi a kawl lai humhim ngei a tum. Thawhlehni zan khan Spanish rawlthar hian Nuno Borges hnehin inelna bul a ṭan fuh hle.

Seeded pakhatna a nih avangin Alcaraz hi round hmasa berah a khelh ve a ngai lo. Potuguese tlangval Borges hi darkar khat leh minute thum chhungin 6-3, 6-1 in a hneh, a service vawi khat hloh ve mah se ṭum sarih ngawt a chhuhsak thei thung a ni.

Kum 19 mi Alcaraz hian last 16-ah chuan Roberto Bautista Agut a hmachhawn leh ang. Seeded 13-na Bautista Agut hian inkhel dangah Bernabe Zapata Miralles chu 6-2, 6-2 in a lo hneh ve thung - Spanish player pahnih an intawng dawn.

Tun season kal laiah Alcaraz-a'n Buenos Aires leh Indian Wells-ah nomawi a chawi tawh - Miami Open semifinal-ah Jannik Sinner a hneh lo a, a hnu lamah chuan tum ṭum hi tournament a khelh lehna hmasa ber a ni.

Inkhel dangah Casper Ruud chuan Ben Shelton hnehin Barcelona Open last 16 a lut ve bawk. Grand Slam final vawi hnih khel tawh Ruud hian darkar khat leh minute 39 chhungin 6-2, 7-6(1) in hnehna a chang.

World number 3 Ruud chuan, "Season hmasa khan Ben-a hian ṭha tak taka a khel lai ka hmu tawh, kumiah pawh player hlauhawm a ni tih ka hria. A bik takin set hnihnaah khan min chhaih buai takzet," a ti.

Inkhel dangah Diego Schwartzman chuan 6-2, 6-2 in China tlangval Yibing Wu in a hneh. David Goffin-a'n a khingpui Feliciano Lopez 7-6(3), 6-7(4), 6-0 a hnehin Alejandro Davidovich Fokina pawhin Tomas Martin Etcheverry 6-3, 6-3 in a hneh ve bawk.