Bayern an tla, an ngam loh City!

Bayern Munich khelmualah Manchester City chak zo lo mah se first leg-a an result ṭhat zarzoin an tlang a, Pep Guardiola enkawl City hian Champions League semifinal an khel dawn.

Nilaini zan khan Bayern khelmualah City an lenglut a, Erling Haaland chuan German club tan mangchhia a ni tih pholan chhunzawmin goal hmahruai a khung a, mahse, Joshua Kimmich chuan penalty hmanga goal khat khung ve lehin, 1-1 in an inhnehtawk.

City hian first leg-ah 3-0 ngawta hnehna an lo chan tawh avangin inkhel pahnih belhkhawmah 4-1 in an chak a, Champions League semifinal-a Real Madrid tawng turin City an inpetkai.

A hming Haaland

City-in goal an khung ruala hming lam tel nghal ngai ṭhin pakhat a awm a, a hming chu Erling Haaland a ni - Norwegian striker hian minute 57-naah goal hmahruai a khung a, tun season-a goal 48 a khungna chiah a ni!

Inkhel hmasa nena belhkhawmin 4-0 a ni nghal a, Bayern tan beisei a bo nghal tiin a sawi theih. Mahse, German club hian minute 83-naah goal an khung ve leh ta tho a, Manuel Akanji handball chu referee-in video assistant referee (VAR) a rawn hnuah penalty chawina khawp niin a ngai.

Kimmich chuan penalty hi goal-ah a chantir a, mahse, goal thum dang khung belh turin Bayern tan a harsa hret tawh a, an mikhual nen 1-1 in an inhnehtawk.

Pep-a City

City-in a zawna a vawi thum nan Champions League semifinal an lut ta a, an hmachhawn tur erawh Real Madrid an nih avangin Pep-a'n a duh ber Champions League nomawi a chawi thei ang em, tih chu zawhna chhan harsa tak a ni - season hmasa semifinal-ah khan Real hian an lo pet chhuak tawh.

Player siksawi ngun tak Pep-a'n CL match-a a zawna a vawi thum nan first XI ngai a ring nawn a, a tisual lo - player an inman a, an awmna tur hun leh hmun an hria a, treble champion beiseina an la chhi nung zel.

Goal an chhuah hnuah pawh City an talbuai lo a, hahdam leh dam taka khelin game an thunun - keeper Ederson chu fak loh theih a ni lo a, Coman chance neih a dan kha dang lo ngat se, inkhel thawnthu a danglam thei hial ang.

Tuchel a derthawng

Bayern-in tun season Champions League match zawng zawnga la chakpui vektu Julian Nagelsmann banin, Thomas Tuchel an lalut a, mahse, Chelsea ban tak coach kaihhruaina hnuaiah treble champion beiseina a bo nghal - Tuchel hi referee lakah a lungawi lohna a lantir nasat avangin City lakah hian hnawhchhuah a ni.

Tuchel-a kaihhruaina hnuaiah match ruk aṭangin vawi hnih chiah an la chak a, kum 1991-a Soren Lerby hnua Bayern coach ni tawh zinga bul ṭan chhe ber a ni - Champions League leh German Cup aṭangin an tla tawh a, Bundesliga-ah point hnih chiahin hma an hruai mek.

Chutihrual chuan coach ngawt dem theih a ni lo - season hmasaa Robert Lewandowski neitu khan Eric Maxim Choupo-Moting an rin a ṭul a, Manuel Neuer a inhliam a, Sadio Mane-a'n Liverpool-a a khelh angin a la khel chhuak thei lo a, Leroy Sane lah, "Chance miss tupa" a ni rih deuh ber!