Saka-a'n penalty a pet zel ang - Arteta

Arsenal manager Mikel Arteta chuan a player duhlai Bukayo Saka chungah rinna pumhlum a la nghat ngam a, penalty an hmu leh a nih pawhin Saka chu a pet tur a nih thu a sawi chiang.

Saka hian West Ham nen an inkhelh ṭumin penalty a hlah, khung ni se la chuan 3-1 a hma hruai chungin an chak a rinawm. Mahse, a khung loh hnuah goal chhuahin an inhnehtawk zui - England tan Euro final-ah penalty a lo hlah tawh bawk.

Hammers laka penalty a hlah hnuah Saka hian ngaihdam a dil. Nimin tlai khan Arteta chuan thuthar thehdarh tute kawmin, "Penalty kan hmu leh a nih chuan a pet leh ang, a nih loh chuan khelmual chhungah keimah lutin penalty ka pet tir ang," a ti.

Arsenal hian zanin dar 12:30 hian Southampton an mikhual dawn. Premier League hmahruaitu hian Liverpool leh West Ham an inhnehtawk pui avangin an hmahruaina a him lo, zaninah Saints hneh chunga insiamṭhat an tum ang.

Spanish manager Arteta-a'n a duh ang takin team a la rem thei dawn lo. William Saliba leh Oleksandr Zincheckno te chu hliam vangin an la inlan thei dawn lo, chutihrualin Emirates Stadium a nih dawn avangin chak erawh a inbeisei.

Arteta chuan, "Khelh hmabak pasarih kan la nei, chung zinga pali chu Emirates Stadium-ah a ni dawn. Zirtawp zan a nih avangin a boruak a danglam dawn bawk, a tir aṭanga a tawp thleng min thlawp turin fans lam ka sawm," a ti.