Benfica hnehin Inter Milan an tlang Milan Derby kan hmu dawn e!
Inter Milan chu an mikhual Benfica nen 3-3 in an inhnehtawk a, inkhel hmasa nen belhkhawmin Serie A club hi 5-3 in an chak. Inter hian semifinal-ah chuan an hmelma leh elpui ni bawk AC Milan an hmachhawn ang.
Lisbon khawpuia an inkhelh ṭumin Inter hi 2-0 in an chak tawh sa, an dinhmun ti ṭha zual turin San Siro-ah Nicolo Barella hmangin an khung belh - mikhual beiseina thi ṭep tinung turin Fredrik Aursnes chuan chawlhlawk hmain a sut ṭhen.
Argentina tana World Cup chawitu Lautaro Martinez leh substitute Joaquin Correa te hmangin Inter hian 5-1 in an dinhmun an siamṭha, hun tawp dawna Antonio Silva leh Petar Musa te goal chu Benfica tan insiamṭhat nan a tlai lutuk tawh.
UCL beiseina
Inter Milan hi Serie A an khelh hnuhnung panga zinga paliah an chak lo - Champions League khel phak lo zingah an awm mek, club thuneitu lam pawhin UCL quarterfinal-a an result hian an coach Simone Inzaghi hma hun a hril thei tih an sawi hman hial.
Tunah erawh Inzaghi hi ban chi a ni lo, Italian manager zingah chuan Eugenio Bersellini (1980-81) hnu lamah European football inelna sang bera Inter Milan semifinal hruai thleng thei hmasa ber a ni, an sulhnu hi a nep lo hle.
Italian manager Inzaghi chuan, "Champions League semifinal thlen chu thil lawmawm bik a ni, kei leh ka naute tan chuan kan boruak tawn hi lawmna tur tak a ni, hei hian kawng dangah pawh rah ṭha a chhuah ka ring.
"Pawn lam aṭanga kan khelh dan leh kalphung sawiseltu an awm pawh hi a mak hran lo, chutihrualin Inter tana ṭha ber tura kan hriat danin kan kal, chu chuan rah ṭha pawh a chhuah niah kan ngai," tiin a sawi.
Inter striker Romelu Lukaku, Edin Dzeko leh Martinez ten tun hnaiah goal khung an harsat. Benfica lakah erawh Martinez-a'n goal a khung bakah Barella tan a siamsak bawk a, hei hian an harsatna ṭhenkhat chu a chingfel theiin a rinawm.
Serie A lamah che fuh tawk lo mah se Inzaghi naute hian Champions League bakah Coppa Italia semifinal an lut tawh. Coppa Italia-ah hian Juventus nen Turin khawpuiah 1-1 in an inhnehtawk a, an khelmual San Siro-ah second leg khelh an la hmabak.
An hmabak Milan
Italian club tan European football lamah season duhawm a ni mek. Inter Milan emaw AC Milan emaw zawk chuan Champions League final an lut dawn. UCL final-ah Italian club an inlan ngei ngei dawn tihna a ni.
Club pahnih hi tun season chhungin vawi thum an inkhel tawh - Serie A bikah chuan vawi khat ve ve an chak; Italian Super Cup-ah erawh Inter Milan an chungnung, an boruak leh khelh dan thlirin tlang tur zawk hriatthiam a harsa.
Inter striker Lautaro Martinez chuan, "AC Milan nena Champions League semifinal khelh zet chu Milan Derby hlu leh danglam bik a ni dawn. Inter hian a ropuina a nei let leh mek a, chumi zinga ka lo tel ve thei hi ka lawm," tiin a sawi.
Milan club pahnih inkhel hi a boruak a sang ngei ngei dawn, kum 18 liam ta khan Champions League quarterfinal-ah an lo intawng tawh. Tun ṭum an intawn turah pawh an thawnthu hlui hi an sawi thar leh ngei dawn.
Khatih lai khan Inter hi 3-0 in an hnufual a, an fans lamin khelmual chhungah thil hrang hrang an vawm lut - Milan keeper Dida an vawm fuh a, minute 20 chhung inkhel an chawl lailawk hial - kuminah pawh boruak a sang leh vet vet khawp ang.
Inter president Steven Zhang chuan, "Milan Derby hi chu nuam ka ti ṭhin hle, kuminah hian tun hma lama kan chak loh tawhna kha phuba lak theihna remchang kan nei thei dawn a ni," a ti, khelmual inṭawm ni mah se Milan leh Inter inngeih lohzia chu tlang hriat a ni.