Grizzlies leh Lakers intluk mek

Xavier Tillman awmna Memphis Grizzlies chuan Los Angeles Lakers 103-93 in an hneh - NBA Western Conference playoff khelh laiah team pahnih hi 1-1 in an inhnehtawk mek a ni.

Kum 24 mi Tillman hian Memphis tan point 22 a nei a, rebound vawi 13 a la bawk; player pawimawh Ja Morant chu hliam mah se Tillman-a'n playoff china point a neih tam ber ṭum a tawn avangin an chak theih phah.

Lakers player ṭha Anthony Davis chu mit na chungin a inkhel a, nidang a phak lo - minute 38 chhungin point 13 chauh a ni. LeBron James chuan point 28 a nei thung a, mahse hnehna chan nan a tawk zo lo.

Best of seven series khelh turah team pahnih hi 1-1 in an inhnehtawk mek. April 23, Pathianni zing dar 7:30-ah game 3 an khel leh dawn, tlang tur chuan a tlem berah vawi li tal an chak tlin a ngai a ni.

Inkhel dangah Milwaukee Bucks pawhin Miami Heat 138-122 a hnehin, team pahnih te series-ah 1-1 in an intluktawk ve ta chiah bawk. Bucks hian an thiampuipa Giannis Antetokounmpo an chhawr thei lo.

Giannis Anteto-kounmpo awm lo mah se Bucks player pasarih ngawtin point 10 an nei tling, ṭum dang ang lo takin mimala innghat loin point an insem rual - Miami tan pawh hmachhawn an harsat phah niin a lang.

Inkhel dangah Denver Nuggets chuan Jamal Murray-a point 40 hmangin Minnesota Timberwolves chu122-113 in an hneh a, game hmasa pahnihah an chak - round sang zawk thleng turin hna chanve chu an zo tawh tihna a ni.