Harsa takin Gauff a chak

Nilaini zan khan Coco Gauff chuan Stuttgart Open a khel ve ṭan a, kumin atana clay court inelna a hmachhawn hmasakah hian a tir lamah a talbuai, mahse inkhel hautak takah Veronika Kudermetova a hneh hram.

Kum 19 mi Gauff hian nikum khan French Open final a lut, champion chiah lo mah se a thlen san em avangin a lakah beiseina a sang. Russian player hi 6-2, 4-6, 7-6(3) a hnehin last 16 a lut hram a ni.

American tleirawl Gauff hian unforced errors ṭum 53 ngawt a nei a, winners vawi 24 a vaw chhuak thung. Tihsual ngah viau mah se, ani aiin a khingpuiin tihsual a ngah - Kudermetova hian a tihsual vangin point 80 ngawt a pe!

Inkhel dangah Elena Rybakina pawh a chak. Wimbledon champion lai hian wildcard hmanga inlan Jule Niemeier chu 7-5, 6-3 in a hneh a, match dawt lehah chuan Beatriz Haddad Maia nen an inkhel leh ang.

World number 1 hlui Karolina Pliskova pawhin Maria Sakkari chu 6-2, 6-3 in a hneh a, Australian Open champion lai leh seeded pahnihna ni bawk Aryna Sabalenka pawhin Barbora Krejcikova chu 6-2, 6-3 a hnehin quarterfinal a inhlangkai ve bawk a ni.