Hero Super Cup - a thiam pali a hriat kim ta

Indian Super League leh I League club-te inelna Hero Super Cup group stage chu Nilaini zan khan khelh zawh a ni ta a, semifinal khel tur a hriat kim ta - ISL-a beisei phak lo NorthEast United chu a thiam pali zingah an tel dawn.

Highlander hian Wilmar Jordan-a goal li khung chhawr ṭangkaiin Churchill Brothers chu 6-3 in an sawp a, group D inkhel dangah Mumbai City chuan 1-0 in Chennaiyin FC an hneh bawk - team pahnihin point ruk ve ve an hmu a, a tawpah goal difference nei ṭha zawk Highlander an tlang.

Super Cup semifinal-ah hian group tina hmahruaitu ṭheuh chu an tling a, NorthEast United hma hian Jamshedpur FC, Bengaluru leh Odisha te chu semifinal hi an lo inpetkai tawh a ni.

Semifinal hi zaninah khelh ṭan nghal a ni dawn a, Bengaluru leh Jamshedpur te chu zanin dar 7:00-ah hian an intawng ang a, April 22 zanah Odisha leh NorthEast United an inkhel bawk ang - inkhel hi Sony TEN 1 leh Sony TEN 1 HD lamah en theih a ni a, online-a en duh tan fancode app-ah a en theih bawk.

Goal a sur

ISL club NorthEast United-in league lama an chet ṭhat loh chu Super Cup hmanga thup mawi an duh a, I League club Churchill Brothers lakah zahngaihna an lantir lo - goal ruk ngawt an khung.

Highlander tan Wilmar Jordan chu a changtupa a ni a, goal li ngawt a khung - Colombian striker hian minute 27-na aṭanga goal khung ṭanin, first half-ah goal hnih a khung a, second half-ah goal hnih a khung leh bawk.

Wilmar-a'n hattrick a siam hnuah Churchill tan Kingslee Fernandes leh NorthEast United tana lo khel tawh Martín Cháves te chuan goal an khung ve a, 4-2 a ni hman. Mahse, Wilmar bawkin goal khung lehin, Gani Nigam leh Jithin M. S. ten Highlander tan an belhchhah bawk a, Highlander defender Mohamed Irshad-a'n an lamah tilut ve leh mah se Goan club tan awmzia a nei phak lo.

Highlander tan Joe Zoherliana chuan inkhel bul ṭanin, Rochharzela chu bench aṭanga luhtir a ni bawk - Churchill lamah Lalremruata leh Vanlalduatsanga ten inkhel bul ṭanin, Lalawmpuia Sailo chu bench aṭangin a lut bawk.

Chak a tawk lo

Mumbai City-in Indian player hlangin Super Cup an hmachhawn a, match thum an khelhah vawi hnih chak mah se, semifinal luhna turin a tawk zo lo - Mumbai hian an match hnuhnung berah ISL club tho Chennaiyin chu 1-0 in an hneh.

ISL league winner tan Ayush Chhikara chuan minute 33-naah inkhela goal awmchhun a khung a, hun tawp thlenga goal dang a luh loh avangin Mumbai an chak. Mahse, Highlander-in goal ruk ngawt Churchill lakah an khung a, Mumbai tan chakin awmzia a nei phak ta lo.

Mumbai tan forward Lallianzuala Chhangte leh midfielder Lalengmawia Ralte ten inkhel bul an ṭan a, Mizo player tamna ṭhin Chennaiyin hian Mizoram player kawl an nei lo thung.

Hero Super Cup-ah hian Aizawl FC pawh an inlan a, mahse, Mizo club hian group stage-ah point khat chiah hmuin inelna hi an mangṭha a, an match tawp bera an inhnehtawkpui erawh ISL club East Bengal an nih miau avangin inchhuang thei an ni.

Semifinal chu

Zanin dar 7:00-ah Bengaluru leh Jamshedpur ten semifinal hmasa zawk an khel dawn - team pahnih hian an player neih ṭhat thawhchhuahpui chungin Super Cup an hmachhawn a, final luh ngei duhin inelna an hmachhawn ang.

Team pahnih hi vawi 12 ngawt lo intawng tawhin, Bengaluru hian vawi nga hnehna an chang a, Jamshedpur hian vawi li hnehna an chang thung - vawi thum chu chak zawk awm loin an inṭhen.

Bengaluru hian midfielder Lalremtluanga Fanai chu Mizo an kawl a ni a, a inlan erawh a beiseiawm lo - he team hian Gurpreet Singh Sandhu, Sandesh Jhingan, midfielder Javi Hernandez, Sunil Chhetri, Sivasakthi Narayanan leh Roy Krishna te ho an kawl a, final luh tum ngam tur an ni.

Jamshedpur hian match hmasa pahniha hnehna an chan avangin an match hnuhnung berah player an chawlh hahdamtir thei a, Ricky Lallawmawma leh Laldinliana Renthlei te chu an player paiwmawh niin, hliam damkawr PC Laldinpuia a awm bawk.