Season tawpah Joaquin a chawl dawn

Real Betis legend Joaquin chuan season tawp ruala inkhelh a chawlhsan tur thu a puang a, "Ka hun chu a lo thleng ve ta a ni," tiin a boot a khai tawh tur thu a sawi.

Kum 41 mi winger hi Betis academy aṭanga inzir chhuak niin, September 2000 khan club tan a professional match hmasa ber khelin, kum 2006 khan a chhuahsan a, Valencia, Malaga leh Fiorentina tan a khelh hnuah kum 2015 khan Betis-ah vek hian a kir a ni.

Spain tan vawi 51 inlana goal li khungtu Joaquin hian Betis tan Copa del Rey nomawi vawi hnih a chawi a, Spanish Cup-ah hian Valencia chu vawi khat a champion pui bawk.

Joaquin chuan, "Real Betis player ka nihna anga ka season tawp ber chu ka hmang ta. Mahse, hei hi inthlahna atana sawi ka ni lo - 'kan inhmu leh thuai dawn nia' tia inthlahna a ni ber zawk a, a chhan chu inkianga ka awm reng dawn vang a ni.

"Real Betis hi ka tan chuan nunna a ni a, he ka nunna hi ka venghim tlat dawn a ni. A hmaa ka nih ang kha ka ni tawh dawn lo tihna mai a ni a, kha leh chen hlim leh lawm taka ka awm ang tho khan ka awm ang," a ti.

Joaquín hian Betis tan match 521 khel tawhin, goal 68 a khung a, La Liga match khel hnem ber ni turin match sarih chiah a mamawh tawh - Barcelona keeper hlui Andoni Zubizarreta khan match 622 a khel a, tun season La Liga-ah Betis hian match kua khelh tur an la nei.