Set hloh mah se Djokovic a chak

Novak Djokovic chuan Nilaini zan khan Banja Luka Open atana a match hmasa ber a khel. World number 1 hian set hmasa ber hloh zet mah se rawlthar Luca Van Assche chu 6-7 (4/7), 6-3, 6-2 in a hneh let ta tho.

Serbian star hian set khatnaah set point a hmuh a chhawr ṭangkai thei lo, tie break khelh hnuah Van Assche zawkin a la. Set hnuhnung pahnihah erawh player ṭha leh tawnhriat nei zawk Novak tan hna harsa tak a awm tawh lo a ni.

Kum 35 mi Djokovic chuan, "Inkhel harsa tak chu a ni, tennis ka khelh tawhnaah chuan ball kal muanna hmun tak a ni. Ka ball vuak apiang kha a lo la hman zel emawni tih mai tur a ni a, point khat hlawhchhuah pawh a harsa.

"Chutihrualin a tawpa hnehna changtu nih hi chu a nuam ngei ngei, match lehpekah chuan tun aia ṭha lehzual zawkin ka khelh theih ngei pawh ka beisei a ni," tiin a sawi a, a khelh danah hmasawn a ngai tih a hria.

Chak lo zawk Van Assche hian tun hmain junior huangah French Open nomawi a lo chawi tawh, tunah hian kum 18 mi chauh a la ni a, world number 87 niin ranking sang zual 100 zingah chuan kum naupang ber a ni hial.

Grand Slam vawi 22 champion tawh Djokovic hi French Open atan a inbuatsaih mek, a match lehpekah chuan Dusan Lajovic leh Gregoire Barrere inkhela chak zawk a hmachhawn leh dawn a ni.