Hatzidakis-a'n a hna a thawk chhunzawm dawn

Liverpool defender Andy Robertson a nghawk avanga hriat hlawh tak, assistant referee Constantine Hatzidakis chuan Football Asso-ciation lamin a thiam lohna an hmuh loh hnuin match a enkawl leh dawn a, April 22 zana Preston North End leh Blackburn Rovers ten Championship match an khelh turah assistant referee a ni ang.

April 9, Pathianni zana Liverpool leh Arsenal te 2-2 a an inhnehtawk ṭum khan, chawlhlawk hman a nih dawnin Reds full back Robertson chuan thinrim takin match official-te lam a pan a, Hatzidakis hian a kiuin Robertson hi a nghawk - uluk taka en erawh chuan a tih luih niin a lang lo.

English football-a thuneitu sang ber FA lam pawhin he thil thleng hi zirchiang tawhin, an zirchian chhunga chawlhtir Hatzidakis hi a thiam lohna an hmu lo a, football match official hna a thawh ṭhin chu a thawk chhunzawm leh thei dawn a ni.

Hatzidakis chuan Zoom call hmangin Robertson-a hnenah hian ngaihdam a dil tawh thu a sawi a, April 25 zana Leeds United leh Leicester City inkhelh hunah video assistant referee (VAR) lamah assistant hna a thawk bawk ang.