Bhubaneswar-ah Intercontinental Cup

All India Football Federation (AIFF) chuan June hian Hero Intercontinental Cup a buatsaih leh dawn a, he inelna hi Bhubaneswar, Odisha chuan a thleng dawn a ni.

Team pali inelna tur Intercontinental Cup hi international break, June 9-18, 2023 inkar hian khelh a ni dawn a, inelna thlengtu India bakah hian Lebanon, Mongolia leh Vanuatu te chuan inelna hi an hmachhawn dawn.

Indian national football team-ten international break-a match an neih tam theih nan AIFF chuan Hero Intercontinental Cup hi a lo buatsaih tawh ṭhin a, Mumbai (2018) leh Ahmedabad (2019) ah te khelh a lo ni tawh a ni.

AIFF secretary general Dr. Shaji Prabhakaran chuan, "Imphal chuan March thla khan international football hlimawm tak a lo thleng tawh a, tunah chuan Bhubaneswar hun a lo her chhuak ve leh ta a ni," a ti a, Odisha football-in nasa taka hma a sawn phah a beisei thu a sawi bawk.

India hian international football-ah Lebanon hi vawi ruk ngawt lo hmachhawn tawh mah se, Mongolia leh Vanuatu erawh a la hmachhawn ngai lo a, Blue Tigers tan chuan thil thar a ni dawn.

Lebanon hi FIFA ranking-ah 99-na ni mekin, Serbian coach Aleksandar Ilic-a enkawl an ni. Vanuatu hi FIFA ranking-ah 164-na ni mekin, Brazilian coach Emerson Alcântara chuan a enkawl mek.

FIFA ranking-a 183-na Mongolia hi Japanese coach Ichiro Otsuka chuan a enkawl mek thung a, player langsar tia han chhal tur pawh an nei lem lo a ni.

Igor Stimac-a enkawl India hi mahni ram leilungah match nga chhung chu a zawnin tlawm an nei tawh lo a, Afghanistan (2-1), Hong Kong (4-0), Myanmar (1-0) leh Kyrgyz Republic (2-0) te a zawnin an hneh tawh a ni - FIFA ranking-ah 101-na an ni mek a, mahni ram leilungah nomawi chawi ngei an beisei ang.

Kum 2018-a Intercontinental Cup khelh hmasak ber a nih khan Mumbai chuan inelna thlengin, final-ah 2-0 a Kenya hnehin an champion a, he squad-ah hian Lalruatthara, Jerry Lalrinzuala, R. Laldanmawia leh Jeje Lalpekhlua te an awm.

Ahmedabad chuan 2019 khan inelna hi thleng ve lehin, India bakah North Korea, Tajikistan leh Syria te chuan inelna hmachhawnin, India hian point khat chiah hmuin final a lut zo lo a, North Korea an champion.

Kum 2019 Blue Tigers squad-ah hian Jerry Lalrinzuala leh Lallianzuala Chhangte te chiah Mizo player an awm a ni.