Giroud tan contract thar

AC Milan striker Olivier Giroud chuan kum khat daih contract a ziak thar. France international hian kum 2024 thleng Milan jersey a ha chhunzawm dawn tihna a ni.

Kum 36 mi ni tawh mah se Giround hi khelmual chhungah a la ṭangkai, a match hnuhnung berah pawh Napoli lakah goal khungin AC Milan chu Champions League semifinal a hruai thleng.

Chelsea aṭanga Milan a pan dawn khan a vanglai a pel tawh. Mahse, Rossoneri tan hian inelna hrang hrangah match 76 a khelh aṭangin goal 27 a khungsak a, season hmasa khan Serie A nomawi a chawi pui hial.

Giroud chuan, "Ka tan chuan hnehna chan hnu lawka contract ziah chu a lawmawm zual ngei mai, goal leh hnehna chan lawm dan ṭha berte zinga mi a ni ngei ang," a ti a, a khelh mekna Milan nuam a tih thu a sawi bawk.

Milan hi club ropui tak ni ṭhin mah se tun hnaiah an ropui lo, nikuma an champion kha kum 11 hnua league nomawi an chawi lehna hmasa ber a ni hial. Kuminah Champions League lama an thlen san leh avangin team ṭha pangngai tak an indin leh tawh tihna a ni.Giroud tan contract thar