Tuiah chuan Sangha ang hlauh Michael Fred Phelps

Tuifinriat zau tak chu sangha te tana siam a ni a, chung sangha zingah chuan sava ang maia thlawk thei an awm! Thlawk thui thei lo mah se an che rang a, hmelma laka an inven nan tui chungah rang takin an thlawk zeuh zeuh thei - an hmingah 'Flying Fish' an vuah.

Lei chunga kea kal mihring ni si, tuiah pawh sangha ang maia che rang leh hleuh chak a awm; a hming chu Michael Fred Phelps II a ni. American star Phelps hi chanchinbu mite chuan 'Flying Fish' tiin an sawi ṭhin a, tui chunga roreltu a nihzia an sawi lansakna a ni.

Olympic medal 28 neitu, chung zinga 23 chu gold medal a ni. Michael Phelps hi infiamna khawmpui lian Olympic-ah chuan mimala sulhnu nei ṭha ber a ni. Olympic vawi khata amah chauhin gold medal a lak hi ram tam takin an tluk lo, a tluk lo tu zingah India pawh a tel.

Phelps hian kum 15 mi chauh a nih lai aṭangin Olympic chanchin ngaihnawm a ziak ṭan. Sydney Olympic 2000-ah khan 200m butterfly final thleng mah se pangana a ni phak hram. Inelna an neih zawh hnuah Phelps chuan, "Ka thlen chin hi lungawina tur a la ni lo, a aia sang ka la thleng thei a ni," tiin a sawi.

American tlangval chuan sawi zawmin, "Khawvela a ṭha ber nih tumin nitin tui ka hleuh ṭhin, krismas leh ka pianchamah pawh ka chawl chuang lo, inelna kan neih dawn hnaiah phei chuan a aia nasa lehzualin inbuatsaihna ka nei ṭhin," a ti.

A thawkrim a, amahah theihna a awm bawk avangin Athens Olympic 2004-ah chuan khawvel hmelhriat a ni ta. Greek phawpuiah hian - 100m leh 200m butterfly, 200m leh 400m individual medley bakah 4x100m leh 4x200m freestyle relay-ah gold medal a la hem mai! 200m freestyle leh 4x100m freestyle relay-ah bronze medal a la tel bawk. 

Olympic vawi khata medal pariat lak hi a ropui, nipui laia neih ṭhin inelna lianah hian Soviet gymnast Aleksandr Ditatyn-a'n Moscow Olympic 1980-a gold medal pariat a lak chu a nihrual a, gold medal bik chhiar chuan American tui hleuh chak Mark Spitz-a'n Munich 1972-a gold medal pasarih a lak erawh pakhatin a tluk lo.

Phelps chuan, "Ka naupan lai aṭangin midang ten an la tih theih ngai loh thil ti theitu nih ka tum ṭhin, mi tam tak chuan Mark Spitz nen min khaikhin a, a mak hran lo. Hei erawh ka chiang, midang entawna an hnunga kal ka ni lo, kei chu Michael Phelps hmasa ber ka ni," a ti.

Kum 2005 leh 2007 khan Montreal leh Melbourne khawpuiah FINA World Aquatics Championship nghah a ni a, heng inelna pahnihah hian Phelps chuan medal 12 ngawt a lak belh, Olympic ni lo mah se khawvel hmaah a theihna sanzia a lantir chhunzawm.

Inelnaah hian - 100m leh 200m butterfly, 200m freestyle, 200m leh 400m individual medleys, 4x100m leh 4x200m freestyle relay bakah 4x100m medley relay huangah hnehna a chang a, world record pawh pasarih ngawt a siam a ni.

Hlawhtlinna hrang hrang a tawng chho zel a, London Olympic 2012 khan che ṭha leh viau mah se inelna an neih zawh hnuin infiamna khawvel chawlhsan a tum thu a sawi. A chawlh tur thu a sawi hian Phelps hnuk a ulh a, amah ngaisangtute mittui a tla bawk.

Phelps chuan, "Sawi mai a harsa ka ti, mahse infiamna huanga ka hun hman tur ang chu a zo tawh, ka nih tum leh thlen tum chin chu ka zo tawhah ka ngai. Hun rei tak chhung tluk leh din fawmna ka lo chenchilh tawh mangṭha a ngai ta mai hi hrehawm ka ti," tiin London Olympic neih zawh hnuah a sawi.

Tun hma chuan Olympic-a mimal medal la hnem ber chu Soviet gymnast Larisa Latynina a ni a, kum 1950 leh 1960 bawr vel khan medal 18 ngawt a la. London Olympic an hman zawh meuh chuan Phelps -a'n medal 23 a la tling der tawh, record hi a khum chiang hle - a chawlh tur thu a sawi pawh hi a mak hran lo.

- Michael Phelps

A chawlh thu puang mah se Michael Phelps-a'n tui a hlat thei chuang lo. 2012-a chawl kha 2014 April thla a her chhuah meuh chuan inelna hmahchawn turin inbuatsaihna neih a tum leh ta rup mai, rawn kir a tum a ni satliah lo; Rio Olympic 2016 khel tura tlin ngei a tum.

Kum 2016 June thla khan Omaha-ah United States aiawh tur thlanna neih a ni a, mimal leh team inelna pathum ve ve a tel turin a in hleuh tling leh mai. Brazil khawpui Rio-ah khan 100m butterfly (49.82 seconds), 200m butterfly (1:51.51), 400m individual medley (4:03.84), 4x100m (3:08.24) leh 4x200m freestyle (6:58.55) relays-ah te world record chelh chungin a inlan zui.

Tui hleuh chak bik Phelps hian Rio-ah pawh hian gold medal panga leh silver medal pakhat a hlawh chhuak leh a, ram tana fapa hrin manhla bik a nihna a la reh chuang lo, a kum tam deuh tawh mah se ram dang tui hleuh thiam leh hleuh chak ten an la tluk lo hle.

Rio Olympic neih hmain Phelps chuan, "Kum 31 mi ka ni tawh a, tun hma zawng aiin tui chhungah chuan ka ṭha tawh zawk," tiin a elpui tur tana thu hriat nuam lo tak a sawi a, a thu sawi ang ngeiin a ṭha ber a nihna a lantir.

Phelps-a'n intihsiakna huanga tui a hleuh hnuhnung ber chu 2016 August 31 kha a ni. US team chuan 4x100m medley-ah hnehna an chang a, infiammi ropui tan a Olympic gold medal 23 -na leh medal zawng zawng belhkhawm 28-na chiah a ni bawk.

American swimming coach Bob Bowman chuan Michel Phelps hi 'Mi danglam bik, thil tuma chiang' tiin a sawi a, amah hrechiangtu thusawi hian Phelps nihna a sawi lang chiang viau.

Kum 2016 June 13 khan Miss California ni tawh Nicole Johnson nen an innei a, a rukin an innei; an inneih thu hi thla li hnuah an puang chhuak chauh! Johnson nen hian 2007 aṭangin an inngaizawng a, 2012 khan inṭhen mah se 2015 February aṭangin an inngaizawng chhunzawm leh.

Tleirawl a hriat tirh lamah chuan Phelps hian Australian swimmer Ian Thorpe a ngaisang thei hle a, tui hleuh kawngah pawh Thorpe hi a entawn viau a, a mi ngaihsan ang nih a tum ṭhin - a hnuah erawh a entawn aia sang takah a awm.

Tui hleuh thiam ni mah se basketball ngainatna rama awm a ni a, legend Michael Jordan chu infiamna lama a mi ngaihsan bik a ni. Phelps chuan, "Basketball chu khawvel hranah a hruai kai," tiin a dah sang hle.

Infiammi hlawhtling chungchuang ni mah se mimal nunah harsatna hrang hrang a tawk ve tho a, depression a neih leh mahni intihhlum duhna a neih hman hial thu pawh a zep lo. Mahse, heng a harsatna tawhte hi a inhnehtir ngai lo; a tawpah chuan harsana hnehin ropuia ngamtu a ni ta zawk.

Phelps chuan, "A ṭha ber nih i duh chuan, midangin an zuam loh leh tih chhin en pawha an en loh chu i tih theih a ngai. Ka thil duh leh hmangaih chu ka hmu a, chumiah chuan ka beidawng ve ngai lo, hun harsa karah pawh hian lawmna tur tawk a lo awm zel," tiin a sawi.

1.    Swimming World World Swimmer of the Year Award: 2003, 2004, 2006, 2007, 2008, 2009, 2012, 2016

2.    Swimming World American Swimmer of the Year Award: 2001, 2002, 2003, 2004, 2006, 2007, 2008, 2009, 2012, 2015, 2016

3.    Federation internationale de natation swimmer of the year (since 2010): 2012, 2016

4.    Golden Goggle Male Performance of the Year (since 2004): 2004, 2006, 2007, 2008, 2009, 2016

5.    Golden Goggle Relay Performance of the Year (since 2004): 2006, 2007, 2008, 2009, 2016

6.    Golden Goggle Male Athlete of the Year (since 2004): 2004, 2007, 2008, 2012, 2014, 2015, 2016

7.    Golden Goggle Impact award: 2016

8.    SwimSwam Swammy Award for Male Swimmer of the Year: 2016

9.    USOC SportsMan of the Year Award: 2004, 2008, 2011–12,2016

10.    James E. Sullivan Award: 2003

11.    Gazzetta dello Sport Sportsman of the Year: 2003, 2004

12.    Laureus Sportsman of the Year Award (nominated): 2004, 2005, 2008, 2009, 2013

13.    Laureus Comeback of the Year Award: 2017

14.    Sports Illustrated Sportsman of the Year: 2008

15.    Associated Press Athlete of the Year: 2008, 2012

16.    Marca Leyenda award: 2008

Hming pum    Michael Fred Phelps II

Hming lem an vuahsak    "The Baltimore Bullet", "Flying Fish"

Chenna ram     United States

Pianni leh thla    June 30, 1985 (kum 34)

Pianna hmun    Baltimore, Maryland, US

San zawng    6 ft 4 in (1.93 m)

Rih zawng    88 kg (194 lb)

Nupui    Nicole Johnson