Man United an tla; FA Cup la beisei thung

Europa League aṭangin Manchester United an tla a, an chak loh hnuah Man United manager Erik ten Hag chuan Pathianni zan dar 9:00-a Brighton & Hove Albion nen FA Cup semifinal an khelh tur a thlir nghal, thawhchhuah ngei an tum.

Sevilla mualah Manchester United 3-0 in an mualpho a, inkhel hmasa nen belhkhawmin Spanish club vantlang lakah Premier League club lian 5-2 in an tlawm - Europa League semifinal lut phak loin an zinkawng a tawp.

An tlawm chiang

Old Trafford-a an inkhelh ṭumin Manchester United hian 2-0 a hma an hruaina an hum thei lo, an buaina belhchhah tur hian Lisandro Martinez leh Raphael Varane te chu an hliam zui a, second leg an khel chhunzawm thei lo.

Ramon Sanchez-Pizjuan Stadium-ah Harry Maguire leh Victor Lindelof ten inkhel bul an ṭan a, minute riatna lekah Maguire tihsual zar zoin Youssef En-Nesyri chuan goal a khung nghal a, chawlhlawk hmain Loic Bade-a'n a belhchhah.

Sevilla goal thumna luh danah erawh David de Gea a che fuh lo ve thung a, En-Nesyri tan a goal hnihna leh an team goal thumna khung turin harsatna a awm lo. Bruno Fernandes tel loa khel United lamin goal an nei ve thei lo.

Thawh an tum

Manchester United manager Ten Hag chuan, "Hun ṭha kan nei a, dinhmun duhawm taka kan din tawhna aṭangin paihthlakin kan awm. Dem tur an awm a nih chuan keimahni kan ni ang, chutihrualin thil kal tawh kan siamṭha thei lo.

"Chak duhna thinlung kan neih zual a ngai a, player tupawhin Manchester United tana khel tlak a nihna a lantir a ngai. Tunah chuan Pathianni zana kan khelh tur chiah kan ngaihtuah a hun," tiin Brighton lakah thawhchhuah ngei an tum tih a sawi.

Brighton hi awlsam taka paltlang mai theih an ni dawn lo - a hrechiangtu chu Chelsea an ni ang. Alexis Mac Allister, Kaoru Mitoma leh Moises Caicedo te awmna hi Blues hneh hlim an ni a, inrintawkna an neih san lai tak a ni ang.