City hmaah Sheffield United

Pep Guardiola-a'n tun season atan chuan Champions League a ngai pawimawh ber a, a dawtah Premier League - FA Cup pawh a ngaihthah tihna erawh a ni chuang lo, chutihrualin an khingpui tur enin a player ṭha ṭhenkhat a khek a nih pawhin a mak lo ang.

Zanin dar 9:15 hian Wembley Stadium-ah Man City chuan FA Cup semifinal khel turin Sheffield United an hmachhawn dawn. Citizens hi EPL hmahruaitu Arsenal leh Real Madrid nena la inel leh tur an ni a, coach Pep-a tan squad siksawi ngam a ngai dawn.

Ril zai vanga chawl reng Phil Foden chu Man City tan bul ṭan thei tawh tura rin a ni. English forward hian FA Cup a khelh hnuhnung parukah goal sarih a thawk chhuak, ani hi Sheffield tlarhnung tana ven uluk ngai tur a ni ang.

Guardiola chuan, "Phil Foden a lo kir leh thei tawh, match khelh tur kan ngah lai taka a dam ta hi kan lawm, ani hi chu player danglam a ni a, ngai awh leh turin hun pawh a mamawh rei ngai lo," a ti. March thla khan Foden hi zai a ni a, tunah chuan a inkhel leh thei tawh.

Man City meuh hmachhawn dawn mah se Sheffield United boss Paul Heckingbottom a zam bik lo, a naute chuan nuam ti takin Wembley Stadium chhungah football an khel mai dawn a ni tih a sawi chhuak.

Paul Heckingbottom chuan, "Championship leh FA Cup hi chu a danglam hle. League-ah chuan theihtawp kan chhuah a, kan hnathawhah a lungawi thlak. FA Cup-ah pawh lungawina tur ngeia khelh chhuah leh kan tum ang.

"Khawvela team ṭha berte zinga mi kan hmachhawn dawn a ni a, a awlsam lo hle ang. Chutihrualin team ṭha hmachhawn dawn avanga zam ngawt chi erawh kan ni lo," a ti. Semifinal kalkawngah Tottenham pawh an hneh thei a, zaninah beisei an nei ngam ang.

Sheffield hian thih thain Man City an bei dawn tih chu a chiang. Pep-a naute hian tun season FA Cup-ah match li khel tawhin goal 14 an khung a, anmahni lamah a la lut ve miah lo - Everton (1965-66) hnuah goal chhuah loa final lut leh thei hmasa ber nih an tum dawn.

Striker ṭha bik Erling Haaland-a'n tun season kal laiah EPL, FA Cup leh UCL-ah hattrick a siam vek tawh, ani hi hahchawlh tir loa an khelhtir a nih chuan Championship club tan buaipui ber tur a ni ang.