Neeskens hnuaia training ṭha takin an zo

Mizoram Football Association, Royal Dutch Football Association (KNVB) leh Acosa Sports ṭangkawpin an buatsaih football coaching course chu nimin khan Lammualah zawh a ni.

Ni nga chhung awh coaching course hi World Coaches hnuaia neih a ni a, Netherlands legend Johan Neeskens-a'n hoin coach dang pahnih Bert Zuurman leh Kimberly Miranda ten an pui bawk.

Nimin tlai khan certificate semna hun hman a ni a, MFA honorary secretary Lalnghinglova Hmar chuan, "Tun hun ṭha inchang thei hi in vannei hle. Coach ṭha bik hnuaiah training ṭha tak in nei thei a, Mizoram football hmasawn nan hmang ula. Coaching certificate sang zawk neih belh zel turin ka ngen a che u," tiin a sawi.

Coaching course-ah hian coach 28 an kal khawm a, hlawhtlinna an chang vek. Johan Neeskens chuan, "Hun duhawm tak kan hmang hi kan lawm a, hun remchang min petu Mizoram Football Association chungah kan lawm. Ni nga chhungin hmasawna kan hmu a, kan lawm hle a ni," tiin a sawi.

Inter Disctrict Mizoram Junior Boys-a Lawngtlai champion puitu coach Vanlalpeka chuan, "Football leh ni tin nun hmachhawn danah hma kan sawn a, naupang enkawl dan kan hriat belh a, thil thar tam kan hriat belh a ni," tiin Vanglaini a hrilh.

Coaching course-ah hian football ngawr ngawr ni loin ni tin nuna pawimawh (life skills) zir tel a ni - mahni mihring puite zah thiam dan, teammate te nena thawhhona ṭha, ruihhlo leh hriselna tichhe thei laka inven a pawimawhzia, hun vawn dik, taimakna, mahni inthununna leh mahni inrintawkna neih dan tur thlengin zirtirna pek a ni.

Coach training zinga senior ber Joseph Lalsangzuala chuan, "Ka rin loh lam daih kan zir a, football leh ni tin nun dan an thlun zawm ṭha hle. Hmasawnna ṭhahnem tak ka chhar," tiin a sawi.

Services coach Stephan Tawnthansanga chuan, "Zirlai an fuih phur thiam a, an nun dan hmangin an lantir," tiin coach-te inpekna a fak a, hlawkna ṭhahnem tak a chhar thu Vanglaini a hrilh tel bawk.

Mizo footballer lar, Mizoram Police forward F. Lalrinpuia (Valpuia) chuan, "He course-ah hian football ngawr ngawr emaw kan zir dawn kan tih laiin kan nuna thil pawimawh hrang hrang kan zir tel a, naupang aṭanga puitling thlenga pawimawh, football in a ken tel tho si, football leh kan nun inkungkaihna, khawtlanga nghawng ṭha a neih theihna tura zirtirna ṭha tin reng kan dawng a, ka lawm takzet a ni," a ti.

Kum 71 mi Neeskens bakah kum 50 mi Bert Zuurman leh Bollywood film lar Chak de India-a chang tawh Kimberley ten ni nga chhung dawh theihna nen Mizo coach-te an enkawl a, an thawkrim tlang hle.

Khawvela midfielder ṭha ber pawl zinga sawi tel ṭhin Neeskens chuan, "MFA-in hetiang programme an lo thleng thei hi kan lawm takzet a, thlenna nuam tak, training-na kiang maia min lo ruahmansakte hi kan lawm hle a ni," tiin lawmthu a sawi.

FIFA World Cup 1974 final-a goal khungtu Neeskens leh a ṭhiante hian vawiin hian Mizoram an chhuahsan ang.