Champions League-ah tu nge inlan dawn? ; Magpies vs Spurs; Liverpool an tel phak em?

League tawp a hnai a, a ngaihnawm tawlh tawlh - table chung lama champion inum boruak tluk zetin Champions League khelh phak tum boruak a sosang a, top four-a season khar tumin club langsar tak tak an inel mek.

Pathianni zan dar 6:30 hian palina Newcastle United leh pangana Tottenham Hotspur an intawng dawn a, club pahnih inkarah hian point thum chiah a awm - Spurs hi match khatin an khel tam thung.

Zanin dar 7:30 hian Liverpool an inlan ve dawn bawk a, Reds ṭantuten Champions League la beisei ve fan mah se Merseyside club tan erawh thilmak a thlen tel a ngai tawh thung - Nottingham Forest an mikhual dawn.

Zanin dar 7:30-a Brentford khelmuala leng tur Aston Villa pawh top four beisei zinga chhiar ngam an ni a, Unai Emery enkawlna hnuaiah Villa hian hma an sawn hle - point ruk chiahin top four an phak lo.

Hlau suh u!

Player aṭanga teh tur ni se Magpies aiin Spurs squad a chhah zawk tia sawi ngam a ni a, chutihrual chuan London club hi coach Antonio Conte nen an inṭhen a, manager lailawk Cristian Stellini-a'n a enkawl mek - an phur vanglai a ni lo.

Newcastle boss Eddie Howe pawhin hei hi a hrechiang a, a naute chu hlauthawng loa khel turin a fuih. Howe chuan, "Tun season-a kan game pawimawh ber ang hial pawhin sawi se, ka pawm lo hran lo. Tun season-ah hetiang ang game pawimawhah hian kan lo tal chhuak fo tawh ṭhin a, ṭha taka kan khelh leh theih ka beisei," a ti.

Howe chuan sawi zawmin, "Professional nih chuan hetiang game boruak sang hi a nuam ṭhin - hetiang ang game khelh a, hnehna chan hi a châkawm em em ṭhin a ni. Kan theihna zawng zawng hlana khelh kan châk a, hlauhthawnna rilru neih kan duh lo a, a ṭha thei ang bera khelh kan tum a ni," a ti a, Spurs lakah chak ngei a tum.

Mahse, beisei phak baka season hmang ṭha Magpies hian an league match hnuhnung berah Villa chu 3-0 ngawtin an ngam lo a, an mualpho - hei hi Spurs-in an hre reng dawn a, St James' Park-ah chak tumin an leng ang.

Mahse...

Tun hnaia Magpies tawlhthluk thu sawi rualin, Spurs hi indahsang lutuk thei an ni bik lo - an match hnuhnung berah mahni muala khel chungin Bournemouth chu 3-2 in an ngam lo a, an league match hnuhnung paliah vawi khat chiah an chak!

Spurs-in season tharah Champions League khelh an duh chuan insiamṭhat a ṭul a, hetiang boruak karah hian striker chhuanvawr Harry Kane chuan season tharah club a chhuahsan dawn nia sawi thawm a lo awm ve reng bawk - buai laia hriatah chuan a duhawm lo ang.

Cherries nena an inkhelah khan hliam vangin Clement Lenglet lakchhuah a ngai a, ani bakah hian Rodrigo Bentancur (khup), Emerson Royal (khup), Yves Bissouma (ke rêk) leh Ryan Sessegnon (malpui) te chu hliam vanga chawl mek an ni a, hremna avangin Lucas Moura a inlan thei dawn lo bawk.

Hetihrual hian Spurs hi Harry Kane leh Son Heung-min neitu an ni tih hriat a ṭha a, Dejan Kulusevski leh Arnaut Danjuma te pawh an khelh ṭhat ni chuan game thlak danglam tur khawpin an ṭha tawk.

Fimkhur a ngai

Magpies hian Spurs hmachhawn hmain chanchin lawmawm an nei a, midfielder Miguel Almiron chuan league match li zet a khelh tawh loh hnuah club training a zawm leh tawh a, zaninah bul ṭan ngei tura beisei a ni - Villa lakah khan bench aṭanga luhtir a ni.

Newcastle boss Howe chuan, "Bul ṭan thei dinhmunah a ding tiin a sawi ngam. Tun kar chhung zawng training a nei a, a lo kir leh ta hian min tilawm hle. Mahse, a chawlh rei em avangin kan chhawr nghal thei ang em, ka hre lo - he team leh ama tana ṭha tur berin thutlukna kan siam ang," a ti.

Hetihlai hian Allan Saint-Maximin erawh Howe chuan, "A tira kan beisei aiin a chawl rei tawh," a ti a, zaninah Spurs a hmachhawn thei dawn lo - lungngaih lutukna tur erawh niin a lang lo.

Magpies hian Alexander Isak, Callum Wilson, Bruno Guimarães leh Joelinton te ho an nei a, he team hi Spurs laka hnehna chang turin an ṭha tawk.

Liverpool hi

Reds-in an league match hnuhnung berah 6-1 ngawtin Leeds United an sawp a, mahse, he team hian goal an khung ṭeuh hnuah chetsual an ching - Bournemouth (9-0) leh Manchester United (7-0) an sawp hnua an chet dan chu a hretute vek kan ni.

Zanin inkhel tur danglamna erawh mahni muala khel tur an ni a, an mikhual tur hi an league match hnuhnung 10-a chak nei miah lo Forest an ni bawk - Reds tan mahni muala tlawm chu mualphona tawpkhawk a ni ang.

Liverpool hian 2020-21 season-ah khan match hnuhnung point 30 hmuh theih aṭanga point 26 hmuin Champions League an khel hram a, hetiang thilmak hi fan-te chuan a thlen nawn an beisei. Mahse, coach Jurgen Klopp chuan, "Khatihlai leh tun danglamna chu, tunah chuan kan chunga awmte nen kan inhlat em a ni," tiin a sawi.

Merseyside club tan hnehna chang turin Mohamed Salah a pawimawh leh dawn - tun season inelna hrang hranga goal 26 khung tawh forward bakah hian Roberto Firmino, Diogo Jota, Cody Gakpo leh Darwin Nunez an awm a, Luis Diaz a dam chiang tawh bawk.