Curry hoin Warriors an chak

Game hmasa pahnihah chak lo mah se Golden State Warriors an la tlawm mai bik lo. Nimin zing NBA playoff inkhelah Golden State hian an thiampuipa Stephen Curry hoin Sacramento Kings chu 114-97 in an hneh.

Chase Center, San Francisco-a inkhelah Warriors tan Curry chuan point 36 a nei a, mimala point nei hnem ber a ni. Curry hi Andrew Wiggins (20 points), Jordan Poole (16) leh Moses Moody (13) ten an thlawp ṭha hle.

Hrem vangin Draymond Gree a khel thei lo a, damlohna vangin Gary Payton II chu an chhawr thei lo bawk. Coach Steve Kerr-a'n basket neih hnem tluk zetin a venhim hna a ngai pawimawh a, an chetsual tawhna a siam ṭha thei.

April 23, Pathianni zan dar 1:00-ah game 4 an khel leh dawn, an inkhelhna tur hi Chase Center tho a nih avangin Warriors hi chak tura rinkai an ni. Mahse, khualmuala an result ṭha lo ṭhin an siamṭha a nih loh chuan best of seven series latu zawk nih a harsa ang.

Nimin zing inkhel dangah Philadelphia 76ers chuan Brooklyn Nets chu 102-97 in an hneh a, series-ah 3-0 a hma an hruai tawh avangin tlang turin match khat chak chiah an hmabak tawh. Zanin dar 10:00 hian game 4 an khel leh nghal dawn a ni.