Ropui takin Roma tho chhuak

Jose Mourinho enkawl an nih hi chuan an danglam leh tlat ṭhin. Feyenoord mualah si khat faiin AS Roma chak lo mah se, Roma khawpuiah an mikhual hi 4-1 in an lo hneh let, inkhel pahnih belhkhawmah Italian club hi 4-2 in an chak.

Thil erawh a awlsam vek bik lo - Roma hian Leonardo Spinazzola hmangin goal nei hmasa mah se, mikhual lamin Igor Paixao hmanga sutin Dutch club hian 2-1 in hma an hruai let daih, hun tawp dawnah Pablo Dybala chuan sut ve lehin extra time an khel zui.

Extra time-ah erawh Roma an chungnung hle. Stephan El Shaarawy leh Lorenzo Pellegrini ten Roma tan an khung belh, season hmasa Europa Conference League final-ah pawh khan Roma hian Feyenoord hi an lo hneh tawh bawk.

Roma coach Mourinho chuan, "Rome khawpuiah hian ka hlim, a mi chengte leh ka naute hi ka ngaina em em a, chu chu thup theih a ni lo," a ti. Tun hnaiah Mourinho hian Saudi Arabia leh Paris Saint Germain lam aṭangin sawmna duhawm a dawng nia sawi a ni.

AS Roma hi Thawhṭanni zanah Serie A khel turin an inlan leh dawn chauh a, khualmualah Atalanta an lenchilh ang - table-ah palina dinhmun an luah mek.