Ka lo kir hun tur ka hre thei rih lo - Nadal

Rafael Nadal-a hliam a la dam thei lo, a inkhelh thiamna leh nuam a tih berna clay court season pawh a hmang thei lo. Nadal chu Madrid Open aṭangin a inhnukdawk leh a, engtik hunah nge a inkhelh leh theih dawn a sawi thei lo.

January thlaa khelh zawk tak Australian Open-ah khan Nadal hi a khel bawr a hliam, a hnu lamah a la inkhel leh lo. A tirah chuan chawlhkar riat chhung vel chawl tura tih ni mah se, an beisei angin a dam chak lo a ni.

Kum 36 mi Nadal chuan, "Ka hliam a la dam lo, tournament hmachhawn turin ka la inbuatsaih thei lo a ni. Training chu ka nei ve hman, mahse tun hnaiah min enkawl dan chu thlak danglam a ngai leh ta zawk.

"Enkawlna hrang hmang hian eng nge ka an dawn ka la sawi thei lo a, chuvangin engtik hunah nge ka inkhelh leh theih dawn tih hi ka sawi thei lo a ni," tiin social media kaltlangin a dinhmun a sawifiah.

Spanish star hi April 25 aṭanga khelh tur Madrid Open-ah a inlan dawn lo tihna a ni a, clay court inelna lian French Open hmain inbuatsaihna hun a nei mumal dawn lo, tournament pakhat emaw chu a khel hman mai thei tih chauh a ni tawh.

French Open hi May thla chawhnu lamah khelh a ni dawn, vawi 14 champion tawh Nadal hi champion tura rinkai chu a ni ngei mai, mahse tunah chuan a inkhel thei ang em, tih chu zawhna a ni ta zawk.

Grand Slam vawi 22 champion tawh chuan sawi zawmin, "Duhthlan tur dang ka nei lo, theih ni se la chuan a hma thei anga tournament khelh leh pawh ka duh, a bik takin clay court season hman theih loh chu a hrehawm hle," tiin a sawi.

Major title lak hnem lamah Nadal hi Novak Djokovic (22 titles) nen an intluk mek. Tun dinhmunah Serbian star hi a dam ṭha - Nadal a inkhel thei lo a nih chuan Serbian star tan nomawi lian chawi tam lama record siam theihna remchang a ni ang.

Nadal bakah hian hmeichhe lamah Belinda Bencic chu a inkhel thei lo mek. Olympic champion hian Madrid Open bakah Rome Open pawh a khel thei dawn lo tih a sawi, ani pawh hi khel bawr hliam vanga chawl ve tho a ni.