Messi leh Barca an inhnaih?

Paris Saint-Germain-a contract hmang zo mai tur Lionel Messi chu Barcelona nen sawi zawm mek zel a ni a, kum 35 mi forward hian a fate school kalna tur thlengin a hauh lawk tawh niin an sawi.

Barcelona hrechiangtu journalist Adrian Sanchez chuan a youtube channel 'Mas que pelotas'ah hemi chungchang hi a sawi a, Messi hian Paris an pem hmaa a fate school luhnaah a fate tan seat a hauh lawk niin a sawi a ni.

Hetihlai hian Spanish media ṭhenkhat chuan Barcelona hian Messi hi kum hnih atan contract an zawrh niin an sawi a, kum khata euro maktaduai 13 hlawhtir an tum, tih thlengin an tarlang - hei hi PSG-a a hlawh zahve pawh a tling kher lo ang.

Season hmasa lawk thlenga sum lama talbuai tak Barca hian Messi lakluh theih dan an ngaihtuah nasa nia sawi a ni a, Barca Studios-a 24% share chu hralh an tum bakah nipuiah player ṭhenkhat chhuahtir an tum nia sawi a ni.

Barcelona hian Champions League leh Copa del Rey lamah beisei phak lo mah se, La Liga-ah hma an hruai mek a, an hnuai chiaha awm Real Madrid aiin point 11-in an sang zawk.

Pathianni zan dar 7:45-ah Barcelona hian Atletico Madrid an mikhual dawn a, inkhel hmuhnawm a beisei ngam. Pahnihna dinhmun luah mektu Real Madrid chu zanin dar 12:30-ah hian an inlan dawn a, Celta Vigo an mikhual ang.