Juventus lawmna a thuah hnih hmahruaitu Napoli an mikhual dawn

Point 15 an paihsak tawh chu Juventus hnenah pek kir an ni a, point an nei kir tih an hriat aṭanga rei vak lo hnuah Sporting Lisbon hnehin Europa League semifinal an inhlangkai zui nghal bawk - Old Lady tan tun hi hlim hun a ni.

Massimiliano Allegri naute hi hlim avangin awm hahdam ngawt thei erawh an ni dawn lo. Pathianni zan dar 12:35 hian Serie A khel turin, hmahruaitu Napoli chu Allianz Stadium-ah an mikhual zui leh nghal dawn.

Lawmna hmasa

Ningani zantir lamah Juve hian thu thar an nei, chu an thu thar chu kumin January thlaa an point hmuh tawh sa an pek kir thu a ni. Juventus hi an sum hman dan chungchangah dan an bawhchhia nia puh an ni - an sum lakluh leh hman chhuah dan an ziak dik lo lui niin an sawi.

Hei vang hian Serie A point 15 an hmuh tawh sa paihsak an ni a, table laihawlah an tla thla. Mahse, an puhnaah hian an fihlim avangin point an pe let a, tunah chuan pasarihna aṭangin pathumnaah an kir leh nghal - AC Milan nek chhuakin an dinhmun an siam ṭha.

Juventus chief football officer Francesco Calvo chuan, "Tunah chuan kan beisei ang ngeiin point pek let kan ni a, kan point hi kumkhuain kan nei reng tawh ang tih ka ring," tiin a sawi a, a sang zual pathum zingah an tel tlang a beisei tih a sawi bawk.

Lawmna pahnihna

Ningani zanlaiah Juventus hian Europa League semifinal second leg khel turin Sporting Lisbon an tlawh, inkhel hmasah Juve hi 1-0 a chak an ni a, khualmualah pawh minute kuana lekah Adrien Rabiot hmangin goal an nei hmasa.

Portuguese club lamin Marcus Edwards-a penalty hmangin chhanglet mah se goal dang an neih belh lo, inkhelh pahnih belhkhawmah Juve hi 2-1 in an tlang. European football inelna sang pahnihnaah champion turin team pahnih hneh a la ngai dawn.

Juve manager Allegri chuan, "Ka naute zawng zawng an khel ṭha vek, min nawr let dawn tih hre sa chungin kan khel a, kan inven theih danah pawh ka lawm. Tunah chuan Serie A lamah palina ni nghet turin kan bei chhunzawm ang," a ti.

Napoli fiahna

Fal takin Napoli an champion fel vat dawn niin a lang hman a, mahse chutianga awlsam chu a lo ni ngawt bik lo. Naples club hian Lazio lakah point 14 ngawt chuan hma la hruai mah se, tun hnaia an khelh dan thlirin an fimkhur a ngai.

Luciano Spalletti naute hian Serie A lama an hnuaia awm AC Milan an ngam lo a, inelna lian Champions League aṭanga tla hlim an ni. UCL aṭangin tla mah se Diego Maradona hunlai hnua a vawi khat nan Italian champion an nih theih erawh chuan an lawm tho ang.

Napoli coach Spalletti chuan, "Hun kal tawh a hnuhkir theih loh, kan hma lam hun atan erawh inbuatsaihna kan nei thei thung. Kan hmabak hi a ṭha thei ang bera hlenchhuah kan tum ang," a ti. Juventus khelmual aṭanga point thum hlawhchhuah an tum dawn.