Hnehna nen Swiatek a lo kir leh ta

Hmeichhe tennis world number 1 Iga Swiatek chuan a hliam a dam tawh tih a lantir - Ningani zan khan Porsche Tennis Grand Prix-ah inlanin, a khingpui Zheng Qinwen chu straight set hmangin a hneh.

Swiatek hi seeded pakhatna pek a ni a, a tan Stuttgart Open hi thil harsa a la ni rih lo; Chinese nula lakah hian 6-1, 6-4 in a chak a ni.

Kum 21 mi Swiatek hi Indian Wells semifinal-ah a khel bawr a hliam a, a hliam vang hian Miami Open leh Billie Jean King Cup qualifier aṭangin a inhnukdawk - a tan chuan tournament khelh leh hi thil lawmawm a ni.

Poland nula Swiatek chuan, "Ka inkhelh ve leh theih tak avangin ka lawm hle. Ka inkhelh loh rei avangin thil erawh a awlsam vek bik lo, ka nihna ang pangngai 100% nei let leh tur chuan ka beih nasat a ngai dawn," tiin a sawi.

Grand Slam vawi thum champion tawh Swiatek hian a match lehpekah chuan Karolina Pliskova a hmachhawn leh ang. World number 1 hlui Pliskova hian inkhel dangah Donna Vekic chu 6-2, 6-7 (5-7), 7-6 (7-5) in a lo hneh ve thung.

Inkhel dangah seeded pangana Coco Guaff chu Anastasia Potapova lakah 6-2, 6-3 in a chak lo. Russian player Potapova hian Tatjana Maria 7-6 (7-5), 6-4 a hnehtu Caroline Garcia a tum leh ang.

Wimbledon champion Elena Rybakina erawh hliam vangin a inkhel tluan thei lo, a inhnuhdawh tak avangin a khingpui Beatriz Haddad Maia chu a tlang - an khelh hman chinah Brazil nula Maia hian 6-1, 3-1 in hma a hruai a ni.

Paula Badosa erawhin amah ang bawka Spanish player Cristina Bucsa chu 6-1, 6-2 in a hneh a, quarterfinal-ah chuan world number 2 Aryna Sabalenka nen an inkhel leh dawn, hmabak a hautak khawp ang.