ECL semifinal khel tur West Ham

Premier League club West Ham chuan league lama an chet ṭhat loh thupmawi nan Europe lamah result duhawm an neih belh zel a, Europa Conference League semifinal khel turin an inpetkai.

West Ham hian Ningani zan khan an mikhual KAA Gent chu 4-1 ngawtin an sawp a, Michail Antonio chuan goal hnih khungin Lucas Paqueta (penalty) leh Declan Rice te chuan goal khat ve ve an khung bawk.

Belgian club tan Hugo Cuypers chuan goal khat khung ve mah se awmzia a nei phak lo a, inkhel hmasa nena belhkhawmin Hammers hi 5-2 in an chak - Europa Conference League semifinal an khel dawn e.

Team pahnih hi first leg-ah 1-1 in an lo inhnehtawk tawh a, West Ham tan semifinal khelh phak loh chu mualphona a ni dawn tih a chiang. Mahse, goal khung hmasa erawh Gent an ni a, minute 26-na lekah Cuypers chuan Paqueta tihsual zarzoin goal hmahruai a khung.

London Stadium thawm a reh a, mahse, he team hi Arsenal laka comeback hlim an ni a, an beidawng lo. Minute 37-naah Antonio chuan si phurh sutin, 1-1 in chawlhlawk an hmang.

Second half-ah West Ham an hmuhnawm sawt a, minute 55-naah Paqueta chuan penalty hmanga a tihsual thup mawiin Hammers hmahruaina goal a khung a, Rice leh Antonio ten an belhchhah leh bawk - Rice goal khung hi goal mawi bik a ni a, a class sanzia pholanna a ni tel nghal.

Hammers boss David Moyes chuan a player hi fakin, "Rice-a'n khatiang goal kha a khung theih ring lotu an awm a nih chuan, ngaihtuahna seng tam lo tak leh kan inkhel en chiang ngai lo an ni ang.

"Player danglam bik a ni a, chuvang chuan keini chuan kan dah sang em em a ni - Roy of the Rovers (British comic bu a footballer) goal ang mai a ni," a ti a, England squad-a a tawnhriat chuan Rice chu nasa taka a puih thu a sawi bawk.

Kum 24 mi Rice hian West Ham-ah kum khat dang cham turin contract a la nei mek a, tun dinhmunah Arsenal nen sawizawm mek a ni. West Ham hian kum 1980-a FA Cup an champion hnuah nomawi an la chawi leh lo a, ECL-ah thawnthu thar ziah theihna remchang an nei mek - mahse, chumi hma chuan Premier League lam hawi leh phawt a ngai.

West Ham hian Pathianni zan dar 6:30-ah anmahni ang thoa tlak hlau, league match hnih a zawna chak tawh Bournemouth an lenchilh dawn a, ECL nomawi chawi ai mah pawhin Premier League inhamtan hi fans tam zawk chuan an duh ang.