Bayern leh Tuchel tan fiahna

Tun hnai ni 14 chhung lekah Champions League leh German Cup aṭangin an tla a, coach thar Thomas Tuchel enkawlna hnuaiah Bayern Munich an talbuai mek, an harh chhuak thei ang em, tih chu zaninah fiah a ni dawn. Dar 7:00-ah Mainz an lenchilh ang.

Manchester City hneh loa an tlak hnuah Bayern Munich CEO Oliver Kahn chuan striker an mamawh thu a sawi a, a thusawi hi a tihlawhtling hman ang em, hriat a ni lo, ban mai theih dinhmunah a ding mek.

Bayern Munich forward Thomas Muller pawhin goal khung an harsat thu a sawi, an harsatna sutkian dan ngaihtuah a ngai tih a sawi bawk. Muller chuan, "Mainz hi kan inkhelh hah laiin an lo hahchawl a, keini aiin thahrui an ngah zawk mai thei.

"Mahse, keini hi hah sawi thei kan ni lo, tunah chuan City kan ngam lohna aṭang khan a ṭha thei ang bera thawhchhuah kan tum tur a ni," a ti. Muller hian an hmahruaina chu point hnih lek a nih avangin a him lo tih a hrechiang hle.

Bayern leh Borussia Dortmund inkarah point hnih chauh a awm a, match khat lek chetsualah hmahruaitu a inthlak daih thei. Chutihrualin Bundesliga bik erawh Bayern Munich kutah engkim a la innghat tia sawi theih a ni thung.

Mainz lenchilh hi Bavarians tan thil châkawm tak a ni hran lo, tun hnaiah Mainz hian Bundesliga an khelh hnuhnung pakuaah tlawm an nei miah lo - German football inelna sang berah tlawm nei loa kaltluang rei ber an ni mek.

Zanin dar 10:00 hian Dortmund chuan Eintracht Frankfurt an mikhual thung dawn, an elpui Bayern Munich inkhel result hre sain match an khel dawn a ni. Khelh hmabak match ruk chiah a awm tawh a, nomawi inchuh boruak a sang chho dawn hle.