Alonso enkawl Leverkusen an thleng sang

Spanish football legend Xabi Alonso enkawl Bayer Leverkusen chuan Europa League semifinal an khel dawn - German club hian quarterfinal second leg-ah Union Saint-Gilloise chu 4-1 in an sawp a, first leg-ah 1-1 a lo inhnehtawk tawhin, mikhual team Leverkusen hi inkhel pahnih belhkhawmah 5-2 in an chak.

Leverkusen tan Moussa Diaby chuan minute hnihna lekah goal hmahruai khungin, Mitchel Bakker, Jeremie Frimpong leh Adam Hlozek te chuan goal khat ṭheuh an khung bawk a, Saint-Gilloise tana Casper Terho-a'n goal a khung ve meuh chuan Alonso team hian goal thum an khung daih tawh a ni.

Leverkusen coach Alonso chuan, "Kan rilru puthmangin hnehna min chanpui a ni. Diaby goal khung hma khan min pui ngei a, a pawimawh ber erawh kan khel ṭha em em kha a ni.

"Tunah chuan semifinal khel turin kan inpeih tawh - final luh kan hnaih ta hle a, mahse, tunah chuan semifinal sawi hun a ni," a ti a, final thleng thlenga sawi lawk a duh lo.

Leverkusen hian semifinal-ah Jose Mourinho enkawl AS Roma an hmachhawn dawn a, Alonso hi Real Madrid-ah khan Potuguese coach enkawlna hnuaiah a lo khel tawh a ni.

Kum 41 mi Alonso hian October 2022 aṭang khan Leverkusen hi a enkawl ṭan a, Bundesliga table-ah parukna an ni mek bawk - Pathianni zan dar 9:00 hian league match an khel zui dawn a, palina RB Leipzig an mikhual ang. Leipzig hi point sarihin an phak lo mek a, season thara Champions League khelh an tum chuan chak a pawimawh.