Player-ten dan an zah a pawimawh - Robert Klein

Covid-19 vanga inelna chawlh a nih hnuah May 16 aṭangin Bundesliga ṭan a ni a, stadium-ah entu mipui awm thei lo mah se football ngainatu tan chanchinṭha a ni.

La Liga president Javier Tebas pawhin Bundesliga a fak a, chutihrulain Covid-19 a la reh miau loh avangin inelna an kalpui danah pawh an la fimkhur hle. Goal khung an lawm a nih pawhin inkuah an la remti lo.

Inrinni zan inkhelah Hertha Berlin-in Hoffenheim 3-0 in an sawp a, Hertha player-te goal lawm an inkuah chiam. DFL (German football league) chuan Hertha player-te hi an hrem loh tur thu an tichiang tawh.

Chutihrualin Bundesliga International chief executive Robert Klein chuan, "Dan a awm a, tu pawhin an zah tur a ni. Dan ang chuan goal khung an lawm a nih pawhin social distancing zawm chungin an lawm tur a ni a. Chutihrualin goal pawimawh dan a zirin lawm avangin lo theihnghilh palh a awm thei bawk," tiin dan a zawm a ṭul thu a sawi.

Klein chuan sawi chhunzawmin, "Club tin an thawkrim a, player-te hnenah nitinin Covid-19 chungchanga hriattir pawimawh an hriattir nawn leh ṭhin. Dan zawm hi inelna kan chhunzawm theihna tur a ni a, inelna kan zawh theihna tur a ni," tiin a sawi.

Bundesliga hi an ṭan leh tak avangin khawvelin an ngaihven a, inelna lian dang en tur a awm miau loh avangin thil mak pawh a ni lo. Sky Germany chuan a thlawnin an hnuaia programme pakhat goals an ti chhuak a, entu maktaduai ruk neiin record a ni.

Champion lai Bayern Munich chuan point 58 hmuin hmahruaitu an ni mek a, an hnuai chiahah Borussia Dortmund-in point 54 an hmu ve tawh bawk. German club lian pahnih hi May 26, Thawhlehni zan dar 10-ah an inkhel dawn a, entu an tam khawp ang.