MPL Under 18-ah FC Venghnuai an champion nawn

FC Venghnuaiin football kum ṭha an hmang. Aizawl veng lian zinga chhiar tel loh Venghnuai hi football aṭanga teh chuan veng lian a ni. A chhan chu Mizoram Premier League season 9-ah final an lut a, MPL U18-ah kum zawnin an champion.

Inrinni zan khan kum 2023 MiSDA MPL Under 18 final hi Lammualah khelh a ni a, Chhinga Vengin hun rei zawk hma hruai mah se injury time-ah FC Venghnuaiin an sut. Penalty shootout hmangin FC Venghnuai an champion.

FC Venghnuai goalkeeper Joel Lalramchhana chu best goalkeeper a thlan a nih bakah best player atan thlan a ni a, MPL Under 18 leh MPL senior-a goalkeeper 'best player' atana thlan hmasak ber a ni.

Final chu

Chhinga Veng tan MPL U18 final hi thil thar a ni tawh lo a, vawi nga final an luhna a ni. Coach Lalremruata hote hian kum zawna nomawi an chawi hnuah Aizawl FC penalty shootout-ah an hneh lo a, nikum khan FC Venghnuai hi an hneh lo.

FC Venghnuai tan thil thar a ni tawh bik lo a, coach Lalrindika Hmar hoin an champion tawh. Tun ṭumah hian Rindika hnuaia assistant coach hna chelhtu K. Lalthlamuana'n mawhphurhna a chelh ta thung.

Team ṭha zawka ngaih Chhinga Vengin bul an ṭan ṭha zawk a, minute ngana lekah Hnahthial rawlthar Remruatmawia'n ṭha zetin a pet goal. Chhingcows dinhmun ṭhatna belhchhah turin second ṭantirhah Venghnuai captain Lalhualhima chu hnawhchhuah a ni bawk.

League round-a palina Venghnuai an tlawm duh lo a, semifinal-ah league round-a pakhatna Chanmari FC an hneh. Chanmari an hneh ṭuma extra time-a goal hnih khungtu Laldikkima a rawn inlar leh a, injury time minute linaah Chhinga Veng tlarhnung talbuai karah Venghnuai tan goal pawimawh a tauh lut.

Dikkima hi Sangsanga Republic Football Academy-a awm a ni a, Chhinga Veng Under 18 tana khel tawh leh Chhinga Veng coach Remruata hnuaia inzir a ni. Goal dang a luh belh lo a, penalty shootout-ah FC Venghnuai an vannei ta zawk.

Eng nge an sawi?

Chhinga Veng coach Lalremruata chuan, "Theithawp kan chhuah a, champion ngei pawh kan duh. Ṭum nga ngawt final kan lut tawh a, a tawp lamah erawh kan vanduai ta a ni," tiin vawi nga final-a vawi hnih chauh an champion chungchang a sawi.

FC Venghnuai coach K. Lalthla-muana chuan, "Armed Veng leh Muallungthuah-te kan inkhel a, Lammuala ground a ṭhat tawh loh avangin inkhelh a har hle. Player 10-in second half-ah kan khel a, kan vannei a ni. Pathian khawngaihna zar a ni," tiin Vanglaini a hrilh bawk.