Treble champion thei Man City

Manchester City chuan Inrinni zan khan FA Cup semifinal-ah Sheffield United chu Riyad Mahrez hattrick hmangin 3-0 in an hneh. Pep Guardiola hote hi FA Cup bakah hian Champions League leh Premier League-a champion thei dinhmunah an ding a, inelna pathumah hian champion tura rinkai 'ber' an ni vek.

Manchester City hian FA Cup final-ah nizana Brighton leh Manchester United inkhela chak zawk an hmachhawn dawn. Chutihrualin football ngainatute en châk erawh Man City leh Arsenal inkhel a ni a, Premier League final ang hiala chhal theih match pawimawh hi April 26, Nilaini zan dar 12:30 hian Etihad Stadium-ah khelh a ni dawn.

City an ṭha

Pep Guardiola-a'n Erling Haaland bul ṭantir mah se goalkeeper Ederson, midfielder Kevin de Bruyne leh John Stones te hahdamna hun a pe thei a, an squad chhahzia a lang. Spanish manager hian Bayern Munich laka bul ṭantute zing aṭangin player paruk ngawt a thlak.

Championship-a pahnihna dinhmun luah mektu Sheffield erawhin Wembley Stadium-ah sa huai an ser nghalah a ngaih theih. Chutihrualin Paul Heckingbottom hote tan City hneh erawh vana rah ang mai a ni.

Mahrez hattrick

Sheffield United-in bul an ṭan ṭha zawk a, Iliman Ndiaye-a'n a hun ṭha neih chu goal-ah pet mah se City second keeper Stefan Ortega-a'n ṭha takin a dang.

Hemi hnu hi chuan City-in inkhel an thunun a, chance pawh an insiam hnem. Julian Alvarez leh Bernardo Silva ten Blades tlarhnung tana buaina an siam hnuah forward Daniel Jebison chuan ṭul lo takin box chhunga Silva a titlu.

Real Madrid laka penalty hlahtu Erling Haaland aiah Riyad Mahrez rawn pen chhuakin chiang takin a pet goal. Minute 61-naah Mahrez hian goal ropui a khung. Algerian winger Mahrez hian mual laiah tak ball a chhuhsak hnuah a khalh tlang a, ṭha zetin a khung.

Minute 66-naah Mahrez hian hattrick siam nan Jack Grealish a siam chu goal-ah a khung a, Man City-in goal thum an khung bakah Mahrez-a'n hattrick a siam.

Pep Guardiola chuan, "Mahrez hian khelhna hun a neih loh chuan a lungawi lo tih a lantir ṭhin. Vawiinah erawh khelhna hun a nei a, player ṭha bik a nihzia leh stage sanga khel ṭhin a nihzia a pholang. A khelh danah ka lawm a, hun rei zawk kan thawh dun ka beisei," tiin hattrick siamtu Mahrez a fak.

Engtin zel?

Kum 1999-a Sir Alex Ferguson-a hoa Manchester United an treble champion hnuah English club zingah treble champion thei an awm tawh lo a, Pep Guardiola hote tan treble champion theihna kawng a inhawng.

Man City manager Pep Guardiola chuan, "Kan khel ṭha. Ni thum liam ta khan Munich-ah kan inkhel tih hriat a ṭha. FA Cup final kan khel tur hi kan lawm a, June 3-ah helai hmunah hian kan inhmu leh ang," tiin a sawi.

City hian Brighton emaw Man United emaw pawh hmachhawn se, champion tura rinkai zawk an ni dawn. Pep-a hote hian Champions League-ah champion ngun ber Real Madrid an hmachhawn dawn nachungin champion tura rinkai an ni a, Premier League-ah Arsenal hnuaia an awm chungin champion tura rinkai an ni bawk.