Champions League khel tur Arsenal?

Premier League champion an nih tumna a nghing mek a, hmabak hautak tak an hmachhawn dawn - Arsenal tana chanchin lawmawm erawh season tharah Champions League an khel ngei dawn niin a lang chiang ta.

Mikel Arteta naute hian Zirtawpni zan khan Southampton chu 3-3 in an inhnehtawkpui. Khelh hmabak paruk la nei mah se, pangana Tottenham Hotspur tan um phak theih an ni tawh lo - Spurs chungah an awm dawn tih chu a chiang phawt.

Mahse, pariatna Brighton chuan Spurs aiin match hnihin an khel tlem a, an hmabakah an chak a nih chuan Gunners tana UCL ticket hi an la chelh khawtlai ve hret thei - North London club hnuhthlak erawh thil theih loh tluk a ni tawh.

Inhnehtawk

Tun hnaiah Arsenal an zuih - Liverpool leh West Ham lakah goal an neihsa an hum thei lo. Saints lakah erawh hun tawp dawnah Bukayo Saka hmangin siphurh an sut zo hram a, anmahni khelmual Emirates Stadium-ah ngei an tlawm teuh hle.

William Saliba awm lohna Arsenal tlarhnung a phui lo chhunzawm a, minute hnihna lekah Carlos Alcaraz hmangin an khung ṭan, an player hlui Theo Walcott-a'n a hrem zui bawk - goal hnihna luh dawnah Rob Holding-a'n awmna tur a thlang fuh tawk lo.

Gabriel Martinelli hmangin beiseina nei ve mah se Duje Caleta-Car hmangin Saints lamin an vaw dai leh a, hun tawp dawna Martin Odegaard leh Saka te goal chu chakna ni loin point khat hlawhchhuahna mai a ni.

Hmabak City

Arsenal hian Nilaini zanah Manchester City an tlawh dawn, an chak lo a nih chuan Premier League champion beisena a bo zui ang, an chak a nih erawh chuan an kutah engkim a innghat let leh thei thung.

Etihad Stadium-ah hian 2015 hnu lamah Gunners hi an la chak leh miah lo, champion an duh a nih chuan tun ṭumah hian thil mak an thlentir a ngai dawn tihna a ni, manager Arteta erawhin a tawp thlenga an beih tur thu a sawi.

Spanish manager Arteta chuan, "Ka nghakhlel tawh hle, ka naute hian rinkai ni lo chunga hnehna chan dan an hria a, hun harsa leh boruak rit tak tak pawh an lo paltlang tawh, inkhel en manhla tak a ni ngei ang," a ti a, a naute a la ringtawk hle.

Hliam leh buaina

Gabriel Jesus hliam chhung kha chuan an mamawh ang goal an khung thei mai. Saliba awm loh chinah erawh an goal neihsa hum turin an tlarhnung a phui tlat lo - Citizens lamah France international hi a la inlan theih a rinawm loh; Holding an rin nawn a ngaih hmel.

Saints lakah hliam vangin Granit Xhaka a inlan thei lo, a hmun ruak luahtu Fabio Vieira a la rintlak loh. Ball thiam rual Man City lakah eng tiangin nge team a remchhuah theih ang tih chu mi hriat châk a ni mek.

Oleksandr Zinchenko erawh a dam leh tawh a, tlarhnung sir lehlama ding ṭhin Ben White nen Premier League match 100 khel tling tawh an ni a, anni pahnih hian hun harsaah an tawnhriat neih an chhawr ṭangkai a ṭul ang.