Inkhel turin Neymar inbuatsaih ngawrh

Paris St-Germain forward Neymar chuan engtik hunah pawh football khel chhunzawm leh thei turin a inbuatsaih thu a sawi a, an ram Brazil lamah training hautak tak a neih thu a sawi tel bawk.

Coronavirus vangin March 13 aṭang khan French football chu tih tawp lailawk a ni a, hri leng a nasat zel avangin inelna tih tawp chhunzawm vek a ni; champion lai leh hmahruai mektu PSG hnenah nomawi hlan a ni.

France ramah football khel tawh dawn rih lo mah se UEFA chuan Champions League a la ti tawp lo a, Paris club hi UCL-ah quarterfinal an lut tawh; a ṭul a nih chuan ram dangah an home match khelh mai pawh an pawi ti lo.

Kum 28 mi Neymar chuan, "Club lamin ball a pet theih tih an sawi ruala inkhel thei nghal turin ka inbuatsaih a, ka fitness coach Ricardo Rosa chuan ka tih tur hrang hrang a duang a, chumi zui chuan ngawrh takin training ka nei.

"A nihna takah chuan club lamin training kan kalpui ai khan a hautak zawk emaw tih mai tur khawp a ni a, taksa hrisel ṭha neih mai a tawk lo a, inkhel tura inpeih a ngai," a ti. Neymar hi inkharkhip an neih tir lam March thla khan an ramah a haw.

Brazil international Neymar-a'n match a khelh hnuhnung ber chu March 11 daih tawh kha a ni. Bundesliga club Dortmund nen hian a hmuna entu awm loin Champions League last 16 second leg an khel a; Ligue 1 club hi an intawn hmasakah 2-1 in chak lo mah se, an mualah 2-0 an chak avangin inkhel pahnih belhkhawmah 3-2 in hnehna an chang.