Djokovic a chawl rih dawn

Novak Djokovic chu Srpska Open aṭanga a tlak hnu lawkah Madrid Open a khel dawn lo tih a chiang leh nghal. Tournament buatsaihtu lam chuan Serbian star hi a inhnukdawk tih an puang chiang tawh a ni.

Zirtawpni zan khan Djokovic hian Dusan Lajovic hneh loin quarterfinal-ah a zinkawng a tawp. Tun thlatir lam khan Monte Carlo Masters-ah Lorenzo Musetti a lo ngam lo tawh bawk.

Australian Open 2023 hnuah Djokovic-a'n inelna a la hmachhawn tam lo. Indian Wells leh Miami Open a khel lo a, tun hnaia tournament a khelh hnuhnung pahnihah beisei a phak lo bawk a ni.

Kum 35 mi Djokovic inhnuhdawh chhan tak hi chiang taka tarlan a ni hran lo. Madrid Open buatsaihtu lam chuan dam leh thuai tura an duhsak thu an tarlang thung a, hliam enkawl ngai a nei ni ngeiin a lang.

May thla chawhnu lamah French Open khelh a ni dawn. Tuna a lan dan chuan clay court inelna lian atan Djokovic hian inbuatsaihna ṭha tak a nei hman dawn lo tihna a ni - Rafael Nadal pawh hliam vangin a la chawl ve mek bawk.