Nets hnehin 76ers an tlang

Nimin zing khan Philadelphia 76ers chuan Brooklyn Nets 96-88 in an hneh - NBA playoff khelh laiah Sixers hian best of seven series khelh tur chu 4-0 a lain an tlang fel der, game hloh miah loin an chak tlang tihna a ni.

Eastern Conference semifinal-ah Philadelphia 76ers an lut fel a, playoff lehlama intum Boston Celtics leh Atlanta Hawks inkhela chak zawk nen conference final lut zawk nih an inchuh chhunzawm leh ang.

76ers hian an player pawimawh centre Joel Embiid an chhawr thei lo. Most Valuable Player Award dawng thei tura chhawpchhuah zinga mi hi a khup dinglam hliam vangin a inkhel thei rih lo, a tir lamah point neih harsat deuh mah se a tawpah an tho chhuak a ni.

Quarter hmasa pahnihah Nets an chungnung ve ve a, dinhmun duhawm taka ding chungin chawlhlawk an hmang. Mahse, quarter hnuhnung pahnihah Philadelphia 76ers an sang ve leh thung, a belhkawmah an dinhmun a ṭha ta zawk.

Philadelphia tan point 25 a neih baka rebound vawi 12 latu Tobias Harris chuan, "Player zawng zawng kan ṭangrual vek a, tumah inthlahdah leh rilru dang pu kan awm lo, ṭanrual chuan engkim hi a tih theih mai ṭhin," a ti.

Inkhel dangah Phoenix Suns chuan Los Angeles Clippers 112-100 in an hneh a, series-ah 3-1 in hma an hruai mek. April 26, Nilaini zing dar 7:30-ah game 5 an khel leh dawn - Suns hi an chak a nih chuan an tlang tawh ang.