Nottingham hnehtu Liverpool tan beiseina thar

Inrinni zan khan Liverpool chuan an mikhual Nottingham Forest chu 3-2 in an hneh a, season thara Champions League khelh an beiseina chu an chhi nung ve zel - Reds fans an hlim ve leh ta.

Liverpool tan Diogo Jota chuan goal hnih khungin, Mohamed Salah chuan goal khat a thawh bawk a, Forest tana Neco Williams leh Morgan Gibbs-White te goal khungin awmzia a nei phak lo.

Reds-in hnehna an chan avangin table-ah pasarihnaah an chho a, palina Newcastle United chu point ruk chauhin an phak lo tawh. Mahse, match khatin an khel tam a, nizan khan Magpies leh Tottenham Hotspur an inkhel a, he result a zir hian an inthlauhna a danglam leh thei ang - result kan hre hman lo.

Liverpool boss Jurgen Klopp chuan, "Match hnih a zawnin kan chak ve leh ta a, hetiang result kan neih hnuhnun ber kha engtik nge? Min hrilh thei in awm em?" a ti a, Leeds United an hneh hnua Forest an hneh ve leh ta chu a hlim hle.

A hming Jota

Anfield-a inkhelah first half chhungin goal a lut lo a, goal an khung ṭeuh hnu lawka chetsual ching Liverpool fan-te an hlauthawng hman. Mahse, second half-ah Jota a inlar a, Portuguese forward hian goal hnih a khung.

Kum 26 mi Jota hi tun season-ah hliam vangin a talbuai a, kum khat chuang zet chu Reds tan goal a khung tawh lo. Mahse, 6-1 a Leeds an sawp ṭumin goal hnih a khung a, Forest lakah goal hnih tho a khung leh ta bawk.

Minute 47-naah Jota hian Fabinho ball tauh chu lo tauh ve lehin, Forest goal-ah a tauh lut a, ball hi Trent Alexander-Arnold-a corner aṭanga kal a ni. Mahse, Liverpool an hlim tak tak hmain Neco Williams chuan Forest si phurh a sut.

Second half minute ruk chhungin goal hnih a lut a, 1-1 a ni. Mahse, Jota chuan chak ngei an duh tih pholangin, goal an chhuah aṭanga minute lina lekah Andy Robertson-a siamsak chu goal-ah a chantir - a awma la thlain, a malpuiah a sawh tir a, ball kang lai ngei chu a goal hnihna ni turin a khung.

A tawp khartu

Anfield-ah mipui puihna nen Liverpool an khel ṭha a, tlak hlau Forest-in an zam phah lo. Minute 67-naah Gibbs-White chuan ṭha zetin si phurh a rawn sut leh a, Liverpool fans an hawihai.

Mahse, Liverpool-in mangan laia ṭanpui vartu hnai reng Mohamed Salah an nei a, an beidawng lo. Minute 70-naah Arnold-a ball thlawh luh ṭha zet chu Salah hian goal-ah a chantir a, hun tawp thlengin goal dang a lut tawh lo.

Salah hian tun season-ah sawiselna a tawk chungin league match 31-ah goal 16 a khung ta a, inelna hrang hrangah match 44 khela goal 27 khungin assist vawi 11 a nei tawh - player tam tak tan chuan season duhawm bik a tling hial.

Kum 30 mi Salah hian Liverpool tan match 298-ah goal 183 a khung ta a, Reds tana goal khung hnem lamah parukna niin, Robbie Fowler a nih rual chiah - Fowler hian match 369 a mamawh laiin Salah erawhin match 298 bak a mamawh lo.