Real Madrid an chak e
La Liga hmahruaitu Barcelona nen an inkar zau deuh mah se Real Madrid-in inthlahdah phah an tum lo a, Catalan club mut titui lo turin hnehna an chang ve leh ta - Inrinni zan khan an mikhual Celta Vigo chu 2-0 in an hneh.
Real tan Marco Asensio chuan goal a khung bakah Eder Militao khung tur a siamsak bawk a, a team chu point thum hlu tak a hlawhchhuahpui - Real hian match 30 khel tawhin point 65 an nei a, hmahruaitu Barcelona chu point riatin an phak lo mek.
Barcelona hi nizan khan Atletico Madrid nen an inkhel a, an result a zirin Real nena an inthlauhna hi a danglam leh thei ang - he thu buatsaih a nih lai hian an result kan hre hman lo.
Asensio par zan!
Real tan Asensio chuan minute 42-naah goal hmahruai a khung a - he goal luh theih nana Real che vel chu hmuhnawm a tling. Spanish midfielder Dani Ceballos chuan Vinicius Junior tan ṭha zetin ball a siamsak.
Vinicius chuan ball hi ṭha taka tlan luhpuiin Asensio tan a siamsak ve leh a, a awmna tur taka lo awm Spanish attacking midfielder hian chiang zetin goal-ah a lo chantir a, 1-0 in chawlhlawk an hmang.
Real-in first half-ah goal khung turin nghak rei mah se second half-ah erawh an nghak rei lo. Minute 48-naah Asensio corner pet ṭha tak chu Militao chuan a tauh lut a, 2-0 in an chak zui.
Real an hmuhnawm
Carlo Ancelotti nauten La Liga-ah hnehna an chang a, FA Cup semifinal-ah Manchester City an chak bawk - hneh taka hnehna chang ve ve an ni a, rilrua lo awm daih chu Champions League semifinal-a team pahnih intawn hun tur a ni a, en a châkawm tawh takzet.
Celta lakah Vinicius a hmuhnawm lehpek hle. Mikhual team tlarhnung tan hna siamtu ber a ni a, Karim Benzema nen ball an inpek kual hnua Asensio tana a siamsak Ansensio-a'n a pet sualte chu uiawm a tling a, Benzema tana a siamsak Celta keeper Iván Villar-a'n hnai set sawt aṭanga a dante chu uiawm tak a ni.
Mikhual Celta-in chance nei lo tawp erawh an ni bik lo. Oscar chuan penalty box pawn aṭanga a hlah hnuah Iago Aspas chuan chance ṭha a nei a, mahse, Liverpool striker hlui hian goalkeeper Thibaut Courtois chauh a hmachhawn chungin goal-ah a chantir thei lo a, hun tawp lama Goncalo Paciencia tauh luh loh pawh uiawm a tling.
________________
Kan match hnuhnung paliah goal kan chhuah lo a, chu chuan min tilawm takzet. Kan vaia thawhhona leh inpekna rah a ni. Ka naute rilru puthmangin min tilawm a, game pawh kan thunun hneh viau a ni - ka player-te hmuh an nuam a, tlema chau deuhte kan hahdamtir thei bawk.
Player-te an khelh ṭhat avangin game timuang tura substitution siam pawh kha a ngamawm a, a bik takin Asensio leh Camavinga kha an khel ṭha hle.
- Carlo Ancelotti, Real Madrid manager